23 лiпеня 2024, aўторак, 3:01
Падтрымайце
сайт
Сім сім,
Хартыя 97!
Рубрыкі

У Беларусі падскочылі кошты нерухомасці

15
У Беларусі падскочылі кошты нерухомасці

Хто скупляе кватэры?

На рынку нерухомасці ў Беларусі акрэслілася цікавая тэндэнцыя. Як паказвае статыстыка, колькасць угодаў расце - як і кошты, піша «Наша Ніва».

Што з попытам?

За травень 2024 года сярэдні кошт квадратнага метра ў сталіцы вырас на 2,4% і склаў 1520 даляраў. Прычым размова не аб прапанове, а аб рэальных угодах. Планка паўтары тысячы за метр была пераадоленая ўпершыню з 2015 года.

Разбежка сярэдняга кошту кватэр у раёнах Менска выглядала так: ад $1313 за квадрат у Заводскім раёне да $1604 у Цэнтральным.

З пачатку года сярэдні кошт кватэр у Менску па фактычных угодах павялічыўся на 8%.

Тэндэнцыя росту мае ўсе шанцы захавацца, бо травень 2024 года стаў рэкордным у колькасці ўгодаў. Праўда, не ў абсалютных паказчыках, а ў параўнанні з тым жа месяцам у мінулыя гады. Агулам жа праз вялікую колькасць выхадных травеньскія аб'ёмы продажаў былі крыху меншымі, чым сакавіцкія і красавіцкія.

З назіранняў рыэлтараў, амаль 20% продажаў кватэр у Менску прыпадае на жыхароў рэгіёнаў.

Сітуацыя ў абласных цэнтрах

Але кошты нерухомасці растуць не толькі ў сталіцы. Кватэры даражэюць і ў абласных цэнтрах.

Сярэдні кошт жылля ў Берасці, якое з'яўляецца самым дарагім абласным цэнтрам, працягвае расці. На 1 чэрвеня ён склаў $936 за метр. Месяцам раней быў $925. З пачатку года кошты кватэр у Берасці выраслі на 7,2%.

У Гародні, якое займае другое месца па дарагоўлі нерухомасці сярод абласных цэнтраў, кошты таксама растуць.

На 1 чэрвеня метр у Гародні агулам каштаваў $824. Месяцам раней быў $819. З пачатку года кватэры ў Гародні падаражэлі на 3,8%.

Як і ў выпадках са сталіцай, значную долю пакупнікоў нерухомасці ў Гародні і Берасці складаюць жыхары рэгіёнаў.

Іншыя абласныя цэнтры таксама паказваюць рост коштаў кватэр.

Магілёў - плюс 4,2% з пачатку года ($801 за м² на 1 чэрвеня).

Гомель - плюс 7,3% з пачатку года ($796 за м² на 1 чэрвеня).

Аўтсайдэрам сярод абласных цэнтраў з'яўляецца Віцебск, там не толькі самыя нізкія кошты за квадрат, але і самы сціплы рост коштаў. З пачатку года нерухомасць у Віцебску падаражэла толькі на 0,5% і дасягнула $743 за м².

Хто скупляе кватэры?

Людзі, знаёмыя з сітуацыяй на рынку нерухомасці, адзначаюць, што акрамя рэгіяналаў, якія часта набываюць нерухомасць у буйных гарадах для дзяцей, немалую долю складаюць беларусы, якія працуюць за мяжой.

Большасць з іх, з назіранняў прадаўцоў, працуе ў Еўропе дальнабойнікамі.

Сярод прычын, якія ўплываюць на рост коштаў нерухомасці, эканамісты выдзяляюць зніжэнне адсоткавых ставак па крэдытах на куплю нерухомасці. А таксама зніжэнне ставак па валютных укладах. Частка людзей проста «бетануе» свае зберажэнні ў тым ліку праз нізкі ўзровень даверу да банкаў.

У меншай ступені на рост коштаў уплывае попыт з боку замежнікаў, галоўнай выявай расейцаў. Прадаўцы нерухомасці адзначаюць, што калі цікавасць на нерухомасць у Беларусі з боку ўсходніх суседзяў і падрасла, то неістотна.

Напісаць каментар 15

Таксама сачыце за акаўнтамі Charter97.org у сацыяльных сетках