Следам за далярам і еўрам Расея можа страціць і юані

На фондавым рынку РФ новы віток панікі.

На фондавым рынку Расеі панічныя настроі пасля таго, як Масбіржу адрэзалі ад таргоў далярамі і еўрамі. Наступным на чарзе можа стаць кітайскі юань.

Аб гэтым паведамляюць расейскія СМІ, спасылаючыся на экспэртаў, піша Диалог.UA.

Ёсць вельмі высокія рызыкі таго, што банкі Кітая адмовяцца ад супрацоўніцтва з Масбіржай і Нацыянальным клірынгавым цэнтрам РФ, якія патрапілі пад санкцыі Захаду. Калі гэта адбудзецца, расейцам давядзецца спыняць таргі юанем.

Сяргей Раманчук, былы прэзідэнт грамадскай арганізацыі ACI Russia, якая аб'ядноўвае прафесійных удзельнікаў валютнага і грашовага рынку РФ, вельмі песімістычна настроены.

"Хутчэй, не, чым так", – адказаў ён на пытанне, ці працягнуць кітайскія банкі супрацоўніцтва з РФ. Экспэрт інвестыцыйнай расейскай кампаніі "Рыкам-Траст" таксама заявіў аб высокай імавернасці спынення таргоў юанем.

Адзначым, што "дочкі" буйных банкаў Кітая ў РФ, рэагуючы на санкцыі, ужо спынілі разлікі ў далярах і еўрах. Гэта стала цяжкім ударам па тавараабароце паміж Масквой і Пекінам.

Варта ўдакладніць, што санкцыі супраць Масбіржы прывялі да вострага дэфіцыту ў РФ юаняў. 13 чэрвеня расейскія банкі, пазбавіўшыся магчымасці закупляць даляры і еўра, запыталі ў Цэнтрабанка рэкордны аб'ём крэдытаў у юанях - звыш 14 млрд (каля 174 млрд рублёў).

Да такіх мер гульцы звярнуліся, каб мець магчымасць вывесці сродкі на рахункі кітайскіх банкаў. ЦБ быў змушаны ўводзіць ліміты ў аперацыях.