Прэм'ер-міністр Нідэрландаў: Пуцін панікуе

Палітык пракаментаваў вар'яцкую прапанову кіраўніка Крамля.

Расейскі дыктатар Уладзімір Пуцін сваімі шалёнымі так званымі «мірнымі» прапановамі паказаў, што сапраўды панікуе.

Пра гэта прэм'ер-міністр Нідэрландаў Марк Рутэ сказаў журналістам на палях саміту ў Швайцарыі, інфармуе Цензор.НЕТ.

Ён адзначыў, што ўвесь працэс Саміту міру пачаўся ўсяго год таму з 14-15 дарадцаў у нацыянальнай бяспецы, а зараз да яго залучаная палова ААН на ўзроўні лідараў краін.

«Я думаю, што ён (Пуцін. - Рэд.) павінен далучыцца. Цягнік не кранецца без Расеі. Але спачатку - гэтая сустрэча», - сказаў Рутэ.

На пытанне, як прымусіць Пуціна далучыцца да Саміту міру, арганізаванага Украінай, Рутэ адказаў: «Дасягнуўшы поспеху тут. Відавочна, бо ён выйшаў з гэтай вар'яцкай прапановай учора, гэта паказвае нам, што ён панікуе».

Нагадаем, днямі расейскі дыктатар Уладзімір Пуцін заявіў, што Украіна павінна цалкам вывесці свае войскі з 4 акупаваных абласцей для пачатку перамоў з РФ. Таксама ён адзначыў, што Захад павінен даць гарантыі бяспекі Расеі неадкладна.