Forbes: Расейцы масава здаюцца ў палон у Ваўчанску

План акупантаў праваліўся.

Украінскія войскі заблакавалі да 400 расейцаў на хімічным заводзе ў цэнтры Ваўчанска, і паводле звестак Украінскага цэнтра абаронных стратэгій, трыццаць расейцаў ужо здаліся пасля таго, як неаднаразовыя спробы выратаваць іх не ўвянчаліся поспехам.

Як піша Forbes, за некалькі тыдняў разлютаваных баёў часткі некалькіх украінскіх брыгад заблакавалі расейскі наступ на поўнач ракі Воўчы. У той жа час расейскія сілы, эквівалентныя як мінімум двум батальёнам з сотнямі пяхотнікаў, штурмавалі ПАТ «Ваўчанскі хімічны завод» на правым беразе ракі. Відавочна, план расейцаў палягаў у тым, каб захапіць хімічны завод, а затым адтуль пачаць аперацыю па фарсаванні ракі, каб уварвацца ў паўднёвы Ваўчанск.

«План праваліўся, калі ўкраінскія войскі - магчыма, з 9-га стралковага батальёна, Расейскага добраахвотніцкага корпуса або 36-й брыгады марской пяхоты - атакавалі на захад ад хімічнага завода і прасунуліся на некалькі кварталаў на поўнач, адрэзаўшы расейцаў на заводзе ад іх таварышаў на захадзе», - піша Forbes.

Украінскія байцы адзначалі, што расейцы акружаныя без усялякіх шанцаў на эвакуацыю або падмацаванне і паведамлялі аб «процьмы мёртвых і параненых оркаў».

Расейскія камандзіры ў гэтыя выходныя загадалі сваім войскам на захад ад хімічнага завода прарвацца праз украінскія пазіцыі. Аднак дзве спробы прарыву да акружаных расейскіх войскаў былі адбітыя ўкраінскімі сіламі абароны, паведамляе Цэнтр абаронных стратэгій.

«Відавочна, менавіта тады акружаныя расейцы пачалі масава здавацца ў палон. Хоць расейскія і ўкраінскія войскі рэгулярна бяруць у палон адзін аднаго, яны рэдка робяць гэта дзясяткамі. Больш за ўсё палонных, як правіла, здараецца падчас аблогі буйных гарадоў і хаатычных паспешных адступленняў», - адзначае Forbes.

Так, сотні ўкраінскіх вайскоўцаў здаліся ў палон пасля таго, як некалькі тыдняў пратрымаліся ў акружаным Марыупалі. У сярэдзіне лютага 2024 года расейцы захапілі ў палон дзясяткі ўкраінцаў, якія адыходзілі з руін Аўдзееўкі на ўсходзе Украіны.

«Тое, што так шмат расейцаў здалося адначасова ў Ваўчанску, горадзе, які ніводны з бакоў цалкам не кантралюе і які застаецца прадметам спрэчак, павінна было б напалохаць расейскае камандаванне. Расейскае войска не павінна было захраснуць у Ваўчанску. І, безумоўна, яно не павінна была страціць дзясяткі салдат у няўдалай спробе захапіць плацдарм для далейшай спробы пераправіцца праз вузкую раку пасярод горада», - гаворыцца ў артыкуле.

Якімі б ні былі мэты расейцаў, калі яны перасеклі мяжу на поўначы Украіны ў мінулым месяцы, яны не толькі не дасягнулі іх - іх перспектывы на поспех усё больш аддаляюцца, падкрэслівае выданне.