Украінскі ваяр самастойна ўзяў чатырох палонных

Хто ён і як гэта было.

Гетман УСУ Аляксандр Сырскі расказаў, як украінскі ваяр днямі самастойна ўзяў у палон адразу чатырох расейцаў. У 33-й асобнай механізаванай брыгадзе расказалі LIGA.net, што гэта быў сяржант аднаго з падраздзяленняў брыгады Андрэй Ляскавец.

У 33-й АМБр адзначылі, што ўвечары 14 чэрвеня расейскія войскі пад прыкрыццём бранятэхнікі штурмавалі ўкраінскія пазіцыі ў раёне вёскі Перамога каля Мар'інкі.

Падчас штурму малодшы сяржант Ляскавец з супрацьтанкавага ракетнага комплексу MILAN падбіў адну варожую баявую машыну пяхоты. Тады астатняя ацалелая частка расейскага дэсанта разгрупавалася ў пасадцы, так і не даехаўшы да месца прызначэння.

Са звестак вайскоўцаў, 18 расейцаў змаглі дэсантавацца на ўкраінскія пазіцыі, пасля чаго завязаўся бой. Пад камандаваннем Ляскаўца за кароткі час дэсант супраціўніка быў лакалізаваны, а большая яго частка - знішчана.

Уночы 15 чэрвеня Ляскавец удзельнічаў у пошуках і знішчэнні рэшткаў ворага.

А 15.00 15 чэрвеня малодшы сяржант знайшоў рэшткі варожай групы, высунуўся насустрач і адкрыў агонь са стралковай зброі, чым дэзарыентаваў супраціўніка і ўвёў у стан панікі, распавялі ў брыгадзе.

Зарыентаваўшыся ў становішчы і падабраўшы ўдалы момант, ён узяў у палон чатырох вайскоўцаў РФ, адзін з якіх загінуў пры перамяшчэнні - яго дакладным ударам знішчыў расейскі FPV.

Таксама ў брыгадзе падкрэслілі, што варожы штурм удалося адбіць без страт асабовага складу і захаваць баявыя пазіцыі батальёна.

Сырскі, каментуючы гэтую гісторыю, напісаў: "Думаю, што гэты ўчынак з'яўляецца яскравым прыкладам адвагі і высокага баявога духу нашых абаронцаў і абавязкова заслугоўвае ўзнагароджання адпаведнай узнагародай".