Сабаленка не будзе ўдзельнічаць у Алімпіядзе ў Парыжы

Названая прычына.

Беларуская тэнісістка Арына Сабаленка прыняла пастанову не ўдзельнічаць у Алімпійскіх гульнях - 2024 у Парыжы. Усяму віной даволі шчыльны графік і траўмы.

“Я не згуляю на Алімпіядзе праз правілы WTA наконт абавязковых турніраў. Давядзецца чымсьці ахвяраваць, і, на жаль, на гэтым этапе кар'еры мне давядзецца ахвяраваць Алімпіядай”, – сказала Арына.

Пасля паразы ад Міры Андрэевай у чвэрцьфінале "Ралан Гарос" экс-першая ракетка планеты скардзілася на болі ў жываце. А да турніру Вялікага шалома Сабаленка даходзіла да фіналу WTA-1000 у Мадрыдзе і Рыме. У абодвух матчах Арына саступіла Ізе Свёнтэк, якая ўзначальвае рэйтынг найлепшых тэнісістак планеты.

“Сітуацыя складаная, каляндар занадта напружаны. Я прыняла пастанову паклапаціцца пра здароўе”, - дадала Сабаленка.