Славакія сенсацыйна перамагла Бельгію ў матчы Еўра-2024
5- 17.06.2024, 21:06
- 6,416
![Славакія сенсацыйна перамагла Бельгію ў матчы Еўра-2024](https://i.c97.org/ai/599343/aux-head-1718647586-20240101_nalog_360.jpg)
У лідара бельгійцаў Лукаку скасавалі два галы ў другім тайме.
Каманда Бельгіі саступіла камандзе Славакіі ў першым туры групавога этапу чэмпіянату Еўропы ў футболе, які праходзіць у Нямеччыне.
Матч у Франкфурце-на-Майне закончыўся з лікам 1:0 на карысць славакаў, у якіх на сёмай хвіліне забіў Іван Шранц.
У бельгійцаў пасля відэапрагляду скасавалі гол Рамэлу Лукаку на 56-й хвіліне. У лідара бельгійцаў падчас матчу было некалькі небяспечных момантаў, але ён іх не рэалізаваў.
Яшчэ адзін гол Лукаку скасавалі на 86-й хвіліне, таксама пасля відэапрагляду – Лоіс Апенда згуляў рукой.
Даменіка Тэдэска пацярпеў першую паразу на чале каманды Бельгіі, у якую ён прыйшоў у 2023 годзе.
Раней у групе E каманда Румыніі разграміла каманду Украіны з лікам 3:0.
У наступным туры славакі згуляюць з украінцамі 21 чэрвеня, а бельгійцы з румынамі 22 чэрвеня.
У групе E з трыма баламі ў лідарах Румынія, на другім месцы Славакія (3), на трэцім – Бельгія (0), замыкае квартэт Украіна (0).