Польскія фермеры прыдумалі незвычайны спосаб дапамагчы памежнікам на мяжы з Беларуссю

Каб спыніць мігрантаў-мусульман.

Польскія фермеры, якія ўдзельнічаюць у агульнанацыянальным пратэсце, наважылі правесці акцыю на мяжы з Беларуссю. Яны разлілі свіны гной на паласе ўздоўж плота, каб спыніць мігрантаў.

Фермеры такім чынам наважылі дапамагчы памежнікам у іх барацьбе з нелегальнай міграцыяй з тэрыторыі Беларусі, паведамляе wp.pl.

«Мы пачынаем паліваць памежную паласу на польска-беларускай мяжы свіным гноем. Мы пакажам, што праяўляем салідарнасць з польскімі сілавікамі. Мы пакажам уладам, як засцерагчы нашу тэрыторыю», – распавёў прадстаўнік пратэстнага звязу фермераў Дам'ян Муравец.

Ягоны калега адзначыў, што разліваць гной фермеры будуць толькі там, дзе атрымаюць на гэта дазвол ад памежнай службы.

«Усё будзе зроблена паводле закону. Мы спадзяемся, што калі мы разальём свіны гной, нелегалы ​​не пяройдуць гэтую паласу, калі будуць прытрымлівацца сваёй веры», – уважае фермер.

Удзельнікі акцыі ўважаюць, што большая частка мігрантаў, якія спрабуюць патрапіць у Польшчу з тэрыторыі Беларусі, вызнаюць іслам. У гэтай рэлігіі свіння лічыцца нячыстай жывёлай.

Калі менавіта была праведзена акцыя, невядома. З 13 чэрвеня ў Польшчы на ​​мяжы з Беларуссю дзейнічае буферная зона, доступ грамадзян туды абмежаваны.