У Швэйцарыі расейскі дыпламат спрабаваў набыць зброю перад Глабальным самітам міру

Ён ужо пакінуў Швэйцарыю.

Швэйцарскія органы бяспекі перашкодзілі расейскаму агенту, які працаваў дыпламатам у Берне, набыць зброю і «небяспечныя рэчывы» за некалькі тыдняў да Глабальнага саміту мірк.

Пра гэта паведамляе Tages-Anzeiger.

Паводле інфармацыі спецслужбаў, расейскі агент «спрабаваў набыць зброю і небяспечныя рэчывы ў некалькіх месцах у Швэйцарыі». Сярод іншага, ён наведаў краму, якая належыць швэйцарска-нямецкаму гандляру зброяй, але нічога не набыў.

Праваахоўнікі ў рамках расследавання правялі некалькі ператрусаў у дамах. Невядома, ці арыштавалі кагосьці і ці знаходзіцца нехта пад вартай.

Расейскі шпіён у Швэйцарыі падазраецца ў парушэнні законаў аб ваенных матэрыялах і аб забароне экспарту зброі. Яшчэ адзін падазраваны знаходзіцца пад следствам паводле падазрэння ў парушэнні заканадаўства аб кантролі тавараў.

Генеральная пракуратура Швэйцарыі ўжо звярнулася ў Федэральны дэпартамент замежных справаў з просьбай дазволіць адкрыць крымінальную вытворчасць супраць дыпламата, нягледзячы на ягоны імунітэт перад законам.

Паводле інфармацыі выдання, расейскі дыпламат ужо пакінуў Швэйцарыю.