Турцыя перамагла Грузію ў матчы Еўра

3:1.

Каманда Турцыі падолела каманду Грузіі з лікам 3:1 у матчы першага тура групавога этапу Еўра-2024. Сустрэча адбылася ў Дортмундзе.

Туркі выйшлі наперад на 25-й хвіліне пасля гола Мерта Мюлдзюра , які вызначыўся прыгожым ударам з лёту з лініі штрафной у блізкую дзявятку.

На 32-й хвіліне каманда Грузіі зраўняла лік – вызначыўся Жорж Мікаўтадзэ .

Пераможны гол у камандзе Турцыі на 65-й хвіліне забіў 19-гадовы паўабаронца мадрыдскага «Рэала» Арда Гюлер, які выканаў цудоўны абводны ўдар у далёкую дзявятку з-за штрафной.

Трэці гол туркі забілі намаганнямі Керэма Акцюркаглу ў канцоўцы (90+7).

Гюлер стаў першым гульцом да 20 гадоў з часоў Крыштыяну Раналду ў 2004 годзе, хто здолеў забіць гол на Еўра. У спісе самых маладых аўтараў галоў ён на пятым месцы. Рэкорд у швэйцарца Ёхана Фанлантэна (18 гадоў і 141 дзень; 2004 год).

Таксама Гюлер стаў самым маладым гульцом у гісторыі, які забіў у дэбютным матчы на Еўра (19 гадоў і 114 дзён). Ён перасягнуў рэкорд Раналду, які вызначыўся ва ўзросце 19 гадоў і 128 дзён у 2004 годзе ў гульні з Грэцыяй.

Каманда Грузіі ўпершыню ў сваёй гісторыі правяла матч у фінальнай стадыі Еўра ці чэмпіянату свету.

Перад гульнёй заўзятары камандаў Грузіі і Турцыі пабіліся на трыбунах. У бойцы на стадыёне ў Дортмундзе ўдзельнічалі некалькі дзясяткаў чалавек абапал, неўзабаве іх разнялі паліцыянты.

У групе F таксама выступаюць каманды Партугаліі і Чэхіі. Яны згуляюць пазней за 18 чэрвеня.

Наступныя сустрэчы каманды правядуць 22 чэрвеня: грузіны сустрэнуцца з чэхамі ў Гамбургу, а туркі – з партугальцамі ў Дортмундзе.

У 1/8 фіналу Еўра выйдуць каманды, якія занялі першае і другое месцы ў сваіх групах, а таксама чатыры найлепшыя каманды, якія занялі трэція месцы.