Хусіты затапілі судна з расейскім вугалем

Карабель накіроўваўся з порта Усць-Луга ў Ярдан.

Грэцкае гандлёвае судна Tutor, якое перавозіла расейскі вугаль, затанула пасля нападу еменскіх паўстанцаў-хусітаў у Чырвоным моры, паведамляе «Інтэрфакс» са спасылкай на Управу марскіх гандлёвых аперацый Вялікабрытаніі (UKMTO).

У ведамстве ўдакладнілі, што балкер быў абстраляны 12 чэрвеня за 120 км на паўднёвы захад ад партовага горада Хадзейда. Пасля атакі экіпаж судна эвакуавалі на амерыканскі ракетны крэйсер Philippine Sea, а сам балкер кінулі дрэйфаваць. Адзін з чальцоў экіпажа, які, як мяркуецца, знаходзіўся ў машынным аддзяленні карабля, дагэтуль лічыцца прапаўшым без вестак.

Атаку хусітаў на Tutor пацвердзіла Цэнтральнае камандаванне ўзброеных сіл ЗША (CENTCOM). «Безэкіпажны надводны апарат <…> хусітаў ударыў па гандлёвым судне Tutor пад сцягам Ліберыі, які знаходзіцца ва ўласнасці і пад кіраваннем Грэцыі ў Чырвоным моры. <…> Удар прывёў да пашкоджання машыннага аддзялення», - гаварылася ў паведамленні амерыканскіх вайскоўцаў. Таксама па судне было выпушчана некалькі супрацькарабельных ракет, але яны не дасягнулі цэлі.

Балкер Tutor з дэдвейтам 82 тысяч тон 2022 года пабудовы накіроўваўся з расейскага порта Усць-Луга ў Ярдан. Ён стаў другой ахвярай хусітаў - у сакавіку ў выніку нападу затануў балкер Rubymar з 20 тысячамі тон азотных угнаенняў на борце.