BILD: Пуцін і Кім праехалі ў Пхеньяне на кантрабандным старым Mercedes

Такія аўтамабілі выраблялі ў Нямеччыне ў 2005-2013 гадах.

Mercedes S-Klasse W221 у падоўжанай версіі, на якім Уладзімір Пуцін і кіраўнік КНДР Кім Чэн Ын праехалі па плошчы Пхеньяна, быў нелегальна ўвезены ў Паўночную Карэю, піша BILD.

Такія аўтамабілі выраблялі ў Нямеччыне ў 2005-2013 гадах. BILD адзначае, што Mercedes нелегальна завезлі ў КНДР, бо міжнародныя санкцыі забараняюць пастаўкі Паўночнай Карэі ўсялякіх прадметаў раскошы.

У Mercedes адкрылі рассоўны дах, Пуцін і Кім падняліся і высунуліся ў люк шырынёй каля 1,5 метраў.

«Двум дыктатарам і так было цесна, яны стаялі, шчыльна датыкаючыся адзін да аднаго. Але нават дэманструючы моцнае сяброўства, Кім і Пуцін не маглі абмяняцца ні словам, бо гавораць на розных мовах. Сітуацыя стала яшчэ больш камічнай, калі ў невялікі люк высунуўся трэці мужчына - перакладчык, які дапамог дыктатарам абмяняцца парай рэплік», - піша BILD.