У Менску за гадзіну вылілася траціна месячнай нормы дажджоў

Што нарабіла навальніца, якая праляцела над Беларуссю.

Увечары 19 чэрвеня над Беларуссю пранеслася навальніца: выпаў град, дрэвы валіліся на чыгуначныя рэйкі і правады, з-за чаго цягнікі ішлі з затрымкамі. У Зэльвенскім раёне дрэва, якое ўпала, насмерць прыціснула жанчыну, якая прыехала з сям'ёй адпачыць на вадаём. У МНС расказалі пра іншыя наступствы ўчарашняй непагадзі.

Больш за ўсё дасталася Гарадзенскай вобласці: там прайшоў навальнічны фронт з ветрам, які разганяўся да 22 м/с. Пацярпелі шэсць населеных пунктаў у Зэльвенскім і Слонімскім раёнах, пашкоджаны дахі 47 жылых дамоў, два грамадскія аб'екты і чатыры сельскагаспадарчыя будынкі.

Зафіксаваны 73 выпадкі падзення дрэў, 46 выпадкаў — у Гарадзенскай вобласці. Дрэвы, якія ўпалі, пашкодзілі чатыры аўтамабілі ў Гарадзенскай і адзін — у Магілёўскай абласцях. Вядуцца аднаўленчыя работы.

У Менску ўсяго за гадзіну, з 18.30 да 19.30, выпала 23,4 мм дажджу пры сярэднямесячнай норме 89 мм. Былі падтопленыя два адцінкі дарог, затрымка ў руху шасці тралейбусных і аднаго аўтобуснага маршрутаў склала да 1 гадзіны 17 хвілін.

Паводле інфармацыі БЧ, у выніку падзення дрэў на чыгуначныя рэйкі затрымка ў руху 26 пасажырскіх цягнікоў у Віцебскай, Гарадзенскай і Менскай абласцях склала да 2 гадзін 28 хвілін.

Паводле звестак ДВА "Белэнерга", цягам дня на тэрыторыі краіны перыядычна парушалася электразабеспячэнне 571 населенага пункта (Берасцейская вобласць - чатыры, Віцебская - 147, Гомельская - два, Гарадзенская - 91, Менская - 324, Магілёўская - тры), 28 сельскагаспадарчых будынкаў і 1979 трансфарматарных падстанцый. Да раніцы без электразабеспячэння заставаліся 84 населеныя пункты (з іх у Менскай вобласці — 72), а таксама сем сельскагаспадарчых будынкаў і 325 трансфарматарных падстанцый.