Associated Press: Расея можа выкарыстоўваць для нападу на Украіну 10 беларускіх аэрадромаў

Прычым пяць з іх размешчаныя недалёка ад мяжы з Украінай.

Выданне Associated Press са спасылкай на інфармацыю ўкраінскай выведкі паведамляе, што Расея можа выкарыстоўваць дзесяць аэрадромаў у Беларусі для ваенных дзеянняў супраць Украіны, прычым пяць з іх размешчаныя недалёка ад мяжы з Украінай.

Аналітычны ўкраінскі сайт DeepState апублікаваў мапу, на якой пазначаныя гэтыя аэрадромы. Сярод іх выдзяляецца цывільны аэрапорт у Гомелі, які, паводле звестак крыніцы, можа быць адаптаваны для ваенных патрэб.

DeepState сцвярджае, што агулам расейскія вайскова-паветраныя сілы задзейнічаюць 51 базу ў радыусе 600 км ад украінскіх тэрыторый, уключаючы тры базы ў акупаваных усходніх абласцях Украіны, шэсць - у Крыме і 32 - на тэрыторыі Расеі.

Расея пачала маштабныя ваенныя дзеянні супраць Украіны 24 лютага 2022 года, афіцыйна называючы іх «спецыяльнай ваеннай аперацыяй». На пачатку вайны тэрыторыя Беларусі выкарыстоўвалася для размяшчэння войскаў і артылерыйскіх удараў па Украіне, а Лукашэнка выказаў падтрымку дзеянням Расеі.