Сем прыкладаў пячорнага хамства Лукашэнкі

Дыктатару нагадалі аб яго ўзроўні.

На днях Лукашэнка зноў негатыўна выказаўся пра беларусаў. Сайт UDF нагадвае, як дыктатар неаднаразова праяўляў сваё хамства ў дачыненні да грамадзян краіны.

«Вы бачылі, як працуюць кітайцы. Вядома, нашы не працуюць так і працаваць, мусіць, не будуць»

Самая свежая заява Аляксандра Лукашэнкі, якую ён зрабіў 19 чэрвеня падчас сустрэчы са старшынём ФПБ Юрыем Сянько.

«І вы бачылі, як працуюць кітайцы. Канешне, нашы не працуюць так і працаваць, напэўна, не будуць. Але калі б мы блізка былі да працы і аб'ёмаў, якія выконваюць кітайскія працоўныя, я думаю, мы б у некалькі разоў багацейшыя былі», – сказаў дыктатар.

Цікава, што гэтае не першае параўнанне Лукашэнка беларусаў з кітайцамі. У 2011 годзе ён казаў:

«Яны за 20 гадоў здзейснілі гіганцкі рывок у сваім развіцці. У нас ад Савецкага Саюза самая перадавая частка эканомікі засталася. У нас ёсць база, і сёння яна не страчаная. Чаго бракуе? Бракуе кітайскай працавітасці і адказнасці! Як хочаце, так і разумейце мяне. Арганізаванасці! Тамака ўсе ведаюць, што рабіць. Яны ведаюць, што больш папрацуеш, больш заробіш».

«Як мне было сорамна за беларускі народ»

Дарэчы, у тым жа 2011-м у Лукашэнкі была заява і больш моцная. Дыктатар тады не стаў прасіць прабачэння ў народа за валютны крызіс, а пераклаў адказнасць на грамадзян.

«Як мне было сорамна за беларускі народ, калі я прыехаў у Казахстан і ў мяне ўсе пыталіся, што адбываецца ў Беларусі, чаму пустыя паліцы ў крамах. Мне сорамна было ўпершыню за сваю шматгадовую прэзідэнцкую гісторыю за частку людзей, якія стварылі гэты ажыятаж. Бо нас успрымаюць увогуле, як дзікуноў!», – не пасаромеўся сказаць Лукашэнка.

«Наш народзец пабег у абменныя пункты»

Яшчэ праз два гады даў характарыстыку беларускаму народу, якую яму ўзгадваюць дагэтуль.

«Але апошнія месяцы, я гляджу, наш народзец пабег у абменныя пункты. Ну, бяжыце, бяжыце! Будзе попыт на валюту вялікі - будзе абясцэньвацца беларускі рубель з усімі наступствамі», - абвінаваціў Лукашэнка грамадзян краіны.

«Іншага народа няма, і не такі ўжо дрэнны ў нас народ»

У 2019 годзе дыктатар даў невысокую адзнаку беларускаму народу пры размове з чыноўнікамі.

«Не дапускайце хамства ў дачыненні да людзей, бо шмат скаргаў. Не трэба іх адпіхваць. Іншага народа няма, і не такі ўжо кепскі ў нас народ», - сказаў дыктатар вертыкальшчыкам.

«А зараз яны б'юцца ў дзверы амбасадаў нашых, тэлефануюць у МЗС»

У сакавіку 2020 года, падчас пачатку пандэміі Лукашэнка негатыўна выказаўся пра шматлікіх грамадзян Беларусі, якія прасілі свой урад вярнуць іх на радзіму.

«А зараз яны б'юцца ў дзверы амбасадаў нашых, тэлефануюць у МЗС: забярыце нас. Але мы не можам 10 тысяч у адзін дзень забраць», - сказаў дыктатар.

«Кіравалі нашымі, прабачце мяне, авечкамі»

У жніўні 2020 года Лукашэнка не дараваў беларусам, што яны не пагадзіліся з фальсіфікацыяй вынікаў прэзідэнцкіх выбараў і гвалтам супраць пратэстоўцаў.

«З Польшчы, Вялікай Брытаніі і Чэхіі былі званкі, кіравалі нашымі, прабачце мяне, авечкамі: яны не разумеюць, што робяць, і імі пачынаюць ужо кіраваць», - выказаў сваю версію дыктатар.

Затым ён называў грамадзян «наркаманамі» і «прастытуткамі».

«Нашы людзі часам патрабуюць ад улады тое, што ўлада рабіць не павінна»

У сакавіку гэтага года Лукашэнка фактычна дагаварыўся да таго, што ўлады не павінны адпрацоўваць выплачаныя ў бюджэт падаткі.

«Нашыя людзі часам патрабуюць ад улады тое, што ўлада рабіць не павінна. Ну такія людзі, такі народ, і іншага ў нас не будзе - гэта зразумела... Усе крычаць: у Менску двары дрэнныя - канавы, ямы. Мы гэта разумеем. Быць не павінна. Але трэба і разумець: для таго, каб зрабіць у Менску ў адзін момант усе двары (што мы пачалі, вядома, рабіць — нікуды ад гэтага не ўцячэш), трэба разумець, што мы з нейкай вёскі забярэм грошы. Лішніх грошай не бывае», - сказаў дыктатар.

І прапанаваў менчукам…скінуцца, калі яны хочуць хутка ўрэгуляваць праблему з добраўпарадкаваннем двароў (маўляў, няхай 2% выдаткаў на працы выплачваюць жыхары, астатняе — дзяржава).