Навукоўцы высветлілі, ці сапраўды жанчыны мерзнуць мацней за мужчынаў

Вядомы міф развеяны.

Амерыканскія навукоўцы з Нацыянальнага інстытута дыябету, хваробаў органаў стрававання і нырак у штаце Мэрылэнд высветлілі, ці праўда жанчыны валодаюць падвышанай успрымальнасцю да холаду ў параўнанні з мужчынамі. Даследаванне апублікаванае ў навуковым часопісе Proceedings of the National Academy of Sciences (PNAS).

Папярэднія пошукі паказалі, што сярэдняя тэмпература цела жанчынаў крыху вышэйшая, чым у мужчынаў, але іх рукі, ногі і вушы, як правіла, халаднейшыя. Гэта можа быць звязана з двума асноўнымі жаночымі гармонамі: эстрагенам і прагестэронам. Эстраген пашырае крывяносныя сасуды ў канечнасцях, даючы цяплу сыходзіць, у той час як прагестэрон звужае капіляры ў скуры, падвышаючы ўнутраную тэмпературу, але абмяжоўваючы крывацёк у канечнасцях.

У новым даследаванні 12 жанчынаў і 16 мужчынаў павінны былі знаходзіцца ў пакоі з зменлівай тэмпературай у дыяпазоне ад 17°C да 31°C. Удзельнікі былі апранутыя ў паўсядзённыя рэчы.

Навукоўцы, якія назіралі за эксперыментам, таксама фіксавалі паказнікі арганізма добраахвотнікаў, адсочваючы газаабмен, электрычную актыўнасць у цягліцах і тэмпературу скуры.

Удзельнікі ацэньвалі сваё ўспрыманне пакаёвай тэмпературы з дапамогай візуальнай шкалы ад «вельмі холадна» да «вельмі горача».

Успрыманне тэмпературы мужчынаў і жанчынаў было аднолькавым цягам усяго эксперыменту, і іх аднолькава калаціла пры ніжэйшых тэмпературах. Самая нізкая тэмпература, якую яны маглі вытрымаць перад тым, як пачаць дрыжаць, была аднолькавай – 20–21°C.

Жанчыны сапраўды падтрымлівалі крыху больш высокую тэмпературу цела пры нізкіх тэмпературах, чым мужчыны. Гэта можа быць звязана з тым, што жанчыны ў сярэднім мелі больш высокі адсотак тлушчу ў арганізме, чым мужчыны, і, такім чынам, большую ізаляцыю, пішуць даследнікі ў артыкуле.

Тэмпература, пры якой жаночы арганізм пачынае выдаткоўваць энэргію, каб заставацца ў цяпле – тое, што даследнікі назвалі «ніжнекрытычнай» тэмпературай – таксама была крыху ніжэйшай, чым у мужчынаў, у сярэднім прыкладна на 1°C.

У сукупнасці вынікі паказалі, што жанчыны і мужчыны аднолькава рэагуюць на змены тэмпературы. Любыя адрозненні, якія вы можаце назіраць у розных людзей, заснаваны на іх індывідуальных адрозненнях у складзе цела.