Іншаземца здзівіла звычка беларусаў, на якую самі яны не звяртаюць увагі
44- 22.06.2024, 16:44
- 61,832
Яна звязаная з метро.
У Ціктоку з'явілася відэа замежніка, якому давялося скарыстацца паслугамі менскага метро. Ён здзівіўся паводзінам беларусаў, якія ўвесь час пры выхадзе прытрымлівалі дзверы. Каментатары, аднак, запэўнілі яго, што ў гэтай звычцы няма нічога незвычайнага, піша Telegraf.news.
Многія карыстальнікі сацсеткі здзівіліся рэакцыі замежніка і мяркуюць, што ў такіх паводзінах суайчыннікаў няма нічога незвычайнага. Маўляў, такая «звычка ёсць ва ўсіх». Да таго ж дзверы ў сталічным метро даволі цяжкія, і калі іх не прытрымаць, можна сур'ёзна траўмаваць чалавека, які ідзе ззаду.
@niekitai нежные мужчины
♬ О, Боже, какой мужчина! - Натали
«Я баюся, калі не прытрымаю, наступнага прыб'е дзвярыма», – напісаў адзін з беларусаў пад відэа і сабраў амаль 30 тысячаў каментароў.
«Дык гэта база, усе ж так робяць, не?» – здзівіўся рэакцыі аўтара відэароліка яшчэ адзін каментатар.
«Я заўсёды так раблю, а дзесьці інакш?» – задалася пытаннем яшчэ адна дзяўчына.
«Гэта заводскія налады. Як не пераходзіць дарогу на чырвоны, калі няма машынаў», – напісаў яшчэ адзін карыстальнік.
«Мы яшчэ талончыкі перадаем, калі выходзім з аўтобуса ці іншага транспарту, каб іншыя не прабівалі. А часам пакідаем на сядзеннях транспарту ці побач», – расказала яшчэ адна беларуска ў каментарах.
Некаторыя каментатары паспяшаліся нагадаць, што такое дзеянне ніяк не звязанае з нацыянальнасцю і абумоўленае «элементарным клопатам» і «выхаваннем». Іншыя ж выказалі здагадку, што ў іншых краінах гэтак не робяць, бо там папросту няма такіх небяспечных і цяжкіх дзвярэй у метро.