Кіроўцаў таксі чакае яшчэ адзін «сюрпрыз»

Пасля ўключэння ў рэестр.

У Беларусі з'явіцца дзяржаўны рэестр аўтамабільных перавозак пасажыраў у нерэгулярных злучэннях. У яго будуць уключаць не толькі перавозчыкаў, але і кіроўцаў таксі. Пасля трапляння ў рэестр кіроўцы таксі не змогуць яго выкарыстоўваць для асабістых патрэб, але і гэта не ўсё.

Як расказаў першы намеснік начальніка Транспартнай інспекцыі Юрый Касцюк, у непрацоўны час аўтамабіль таксі павінен знаходзіцца толькі на ахоўнай стаянцы.

«Калі аўто аформленае як таксі, то, паводле правілаў перавозкі пасажыраў, існуе норма, якая абавязвае захоўваць такія транспартныя сродкі на ахоўных стаянках. У іншым выпадку такія дзеянні будуць парушэннем. Пры гэтым дакумент, які пацвярджае захоўванне аўто, для ўключэння ў рэестр не патрабуецца», - растлумачыў Касцюк.

Ён не паведаміў, якія санкцыі могуць прымяняцца за гэтае парушэнне. Хто будзе несці выдаткі аплаты ахоўнай стаянкі - кіроўца або перавозчык, ён таксама не ўдакладніў.