Што за што на менскай Камароўцы ў гэтую суботу-нядзелю

Беларусы могуць купіць незвычайныя персікі.

На прылаўках Камароўскага рынку ў Менску ў гэтую суботу-нядзелю можна купіць незвычайныя персікі. Пра цану гародніны і садавіны расказвае агенцтва «Мінск-Новості».

На прылаўках з гароднінай маладую бульбу прапануюць цаной ад 2 да 4 рублёў за кілаграм. Агуркі прадаюцца за 3-3,5 рубля, а памідоры сорту «Будзёнавец» можна купіць за 8,5 рубля за кіло.

Зяленіва каштуе 1,5 рубля за 100 грамаў. Самай дарагой гароднінай на рынку выявілася цыбуля-парэй, якая прадаецца за 40 рублёў за кілаграм.

У сэктары садавіны і ягад нэктарыны і персікі прапаноўваюцца ад 5,90 рубля за кіло. Цікава, што за тую ж цану можна купіць персікі з незвычайнымі смакамі: персік з ігрушай, персік з манга і персік з яблыкам.

Беларускія ажыны і буякі прадаюцца за 20 рублёў за кілаграм, а садовыя маліны і чарніцы — за 10 рублёў. Самымі даступнымі ягадамі выявіліся чырвоныя парэчкі, якія можна купіць за 4,5 рубля за кіло. Цана трускалак — ад 7 да 13,90 рублёў за кілаграм.

Прадаўцы адзначаюць, што сёлета мінімальная цана трускалак вышэйшая, чым летась, калі яна дасягала 6 рублёў за кілаграм.