Як Лукашэнка нахабна хлусіў у Койданаве

Поўнае ашуканства.

У пятніцу, 21 чэрвеня, Аляксандр Лукашэнка наведаў Койданаўскі раён, дзе сказаў шмат прыгожых слоў на цырымоніі адкрыцця фізкультурна-аздараўленчага комплексу "Алімп". Але не стаў прасіць прабачэння перад мясцовымі жыхарамі за вялізную страту для рэгіёну.

Што не так з заявай аб развіцці прамысловасці

У сваім выступе Лукашэнка рабіў выгляд, што ўлады дапамагаюць рэгіёну развівацца. Дыктатар адзначыў: “Што тычыцца прамысловасці, тут дастаткова прадпрыемстваў - з Менска людзі пачынаюць вяртацца. Мы будзем у будучыні падтрымліваць заводы, фабрыкі найперш у гарадах”.

У гэты момант дыктатар “забыўся” пра галоўную страту Койданаўскага раёна апошніх гадоў.

Прадпрыемстве, якое давала больш за 60% прамысловай вытворчасці рэгіёна. Пра завод, дзе працавалі больш за 1500 чалавек. Прадпрыемства, якое развівалася, пашыралася і інвеставала ў мадэрнізацыю. І чыя будучыня была перакрэсленая суўдзелам Лукашэнкі ў ваеннай агрэсіі супраць Украіны.

Дыктатар "забыўся" пра завод "Штадлер Мінск", які базуецца ў горадзе Фаніпаль Койданаўскага раёна. "Салідарнасць" нагадвае пра яго лёс.

З 2014 года прадпрыемства было другім паводле велічыні філіялам швайцарскай кампаніі ў свеце і выпускала тут да 500 вагонаў за год - для краін Усходняй Еўропы і СНД. "Штадлер" быў адным з найбуйнейшых інвестараў не тое што ў Койданаўскі раён, а ў беларускую эканоміку агулам.

На перспектывах завода і мясцовых работнікаў быў пастаўлены тлусты крыж, калі - пасля суўдзелу рэжыму Лукашэнкі ў ваеннай агрэсіі - супраць Беларусі ўвялі санкцыі, забараніўшы імпарт электронных кампанентаў.

"Штадлер" не заставалася нічога іншага, як перавесці выкананне заказаў у іншыя краіны. Многія работнікі звольніліся, многіх перавялі ў Нямеччыну і ЗША.

Летась стала вядома, што праз санкцыйны ціск швайцарская кампанія адмовілася прадаваць вагоны сваёй вытворчасці Менскаму метрапалітэну, які ў выніку купіў цягнікі ў Расеі.

Афіцыйна "Штадлер" не адмаўляецца ад завода, у надзеі перазапусціць яго пасля зняцця санкцый. Але цяпер Койданаўскі раён пазбавіўся найбуйнейшага вытворцы і інвестара.

Што не так з заявай аб развіцці Койданава, як горада-спадарожніка Менска

“Якая перспектыва ў горада? Гэта горад-спадарожнік Менска. Мы будзем гэты горад вельмі сур'ёзна развіваць”, - сказаў Лукашэнка.

І пасля дадаў: “Койданава павінна быць у парадку. Развіваць будзем Койданава. Як і Лагойск, і іншыя гарады-спадарожнікі. Для таго, каб не перанасяляць Менск”.

Тое, што словы дыктатара так і застануцца словамі, сведчыць той факт, што абяцанням уладаў ужо больш за 10 гадоў: Койданава афіцыйна з'яўляецца горадам-спадарожнікам з 2014-га. За гэты час практычныя нічога не зроблена для таго, каб населены пункт адпавядаў свайму статусу - ні ў плане інфраструктуры, ні ў плане працоўных месцаў.

Лукашэнка ўсё яшчэ абяцае звязаць Менск з найбліжэйшымі гарадамі хуткасным чыгуначным транспартам (“магчыма, у наступнай пяцігодцы”), але, як бачым, адкрыццё ўсяго толькі ФАКу стала для ўладаў грандыёзнай падзеяй, пра якую яны захацелі распавесці на ўсю краіну.

Такім чынам выступ Лукашэнкі ў Койданаве выглядае ашуканствам у спробе прымусіць навакольных забыцца пра няўдачы рэжыму.