Беларусы расказалі, якія тавары вязуць дадому з Польшчы і Літвы

Ад шын да ноўтбукаў.

Беларусы найчасцей вязуць дадому тавары з Польшчы і Літвы. Пра гэта сведчаць вынікі красавіцкага выбарачнага абследавання, якое праводзіў Белстат у чатырох аўтадарожных пунктах пропуску на граніцы Беларусі з краінамі Еўразвязу.

Сацыёлагі раздалі на выездах з Беларусі 2,3 тысячы анкет. З іх 1727 бланкаў былі запоўненыя (709 - замежнікамі, 1018 - беларусамі).

Паводле звестак абследавання, найчасцей беларусы ўвозілі тавары з Польшчы (54,8% ад агульнага кошту тавараў, увезеных у Беларусь падчас правядзення абследавання) і Літвы (28%).

Асноўныя тыпы тавараў, якія завозілі:

кампутарная тэхніка і сродкі сувязі (увезена прыблізна на 360 даляраў ЗША на аднаго чалавека);

сантэхніка (269 даляраў);

электрычная бытавая тэхніка (234 даляры);

мэбля, матрацы, асвятляльныя прыборы (200 даляраў), электраінструмент, бензапілы (183 даляры);

шыны і колы (182 даляры);

тэлевізары (170 даляраў);

парфумерныя і касметычныя сродкі (136 даляраў);

аўтазапчасткі (135 даляраў);

адзенне (73 даляры);

цацкі, гульні, спартыўны інвентар (70 даляраў);

абутак (61 даляр).

А вось вывозілі тавары з Беларусі часцей за ўсё ў Літву (48,6% ад агульнага кошту вывезеных тавараў) і Латвію (42,2%).

Асноўныя тыпы тавараў, якія вывозяцца:

мэбля, матрацы, асвятляльныя прыборы (вывезена агулам на 212 даляраў на аднаго чалавека, які ўказаў факт вывазу і кошт гэтага тыпу тавару);

кампутарная тэхніка і сродкі сувязі (159 даляраў);

электраінструмент, бензапілы (122 даляры);

электрычная бытавая тэхніка (78 даляраў);

будаўнічыя матэрыялы (75 даляраў);

бензін і дызельнае паліва (45 даляраў);

адзенне (43 даляры);

абутак (42 даляры);

прадукты харчавання (38 даляраў).