МЗС Фінляндыі: Мы ўсе з'яўляемся ахвярамі расейскай агрэсіі

Еўропа больш не мае статусу назіральніка ў гэтай вайне.

Кіраўніца МЗС Фінляндыі Эліна Валтанен перад пачаткам Савета міністраў ЕЗ у замежных справах заявіла, што краіны Еўрапейскага Звязу адчуваюць на сабе гібрыдныя атакі Расеі, а таксама заклікала хаўруснікаў працягваць падтрымку Украіны. Пра гэта паведамляе «Укрінфарм».

«Мы надамо ўвагу гібрыдным пагрозам, якія Расея чыніць супраць еўрапейскіх краін цягам мінулых месяцаў і гадоў. Гэта поўны спектр дзеянняў, у тым ліку дэзінфармацыя, кібернетычныя пагрозы, акты сабатажу, напрыклад, супраць такіх краін як Фінляндыя, дзе Расея ператварае міграцыю ў інструмент дэстабілізацыі мяжы. Гэтай жа мэты Расея хоча дасягнуць, сеючы хаос і гвалт у Афрыцы, у рэгіёне Сахель. Гэта азначае, што Еўропа больш не мае статусу назіральніка ў гэтай вайне супраць расейскай агрэсіі. Мы ўсе з’яўляемся ахвярамі расейскай агрэсіі. Важна, каб мы працягвалі дапамагаць Украіне, бо Расея разумее толькі сілу», - адзначыла Валтанен.

Кіраўніца МЗС Фінляндыі таксама прывітала пастанову Вялікай сямёркі ў фінансавай падтрымцы Украіны за кошт даходаў ад замарожаных расейскіх актываў.

«Краіны G7 і ўсе мы можам прадстаўляць крэдыты для Украіны хутчэй і прасцей, і Украіна зможа плаціць іншыя спадарожныя выдаткі за кошт гэтых замарожаных расейскіх актываў. Гэта фантастычны крок у правільным кірунку. Я гляджу наперад, калі гэтыя паступленні і ўвесь масіў гэтых актываў будзе магчымым выкарыстоўваць не толькі для неадкладнай вайсковай падтрымкі Украіны, але таксама, у сярэднетэрміновай перспектыве, для яе аднаўлення», - рэзюмавала яна.