Гендырэктар «Белавія» пакрыўдзіўся на ЗША праз санкцыі
23- 27.06.2024, 9:21
- 18,190
![Гендырэктар «Белавія» пакрыўдзіўся на ЗША праз санкцыі](https://i.c97.org/ai/323576/aux-head-1550148758-20190214_belavia_charter97.org_360.jpg)
А таксама назваў недарэчныя «прычыны» іх увядзення.
У авіякампаніі «Белавія» мноства падзяк ад дыпламатаў і амбасад з усяго свету, таму ўвядзенне санкцый «выклікала пачуццё прыкрасці». Пра гэта ў эфіры дзяржтэлеканала «Беларусь 1» распавёў генеральны дырэктар «Белавія» Ігар Чаргінец.
«У перыяд пандэміі ўжо была закрытая частка маршрутаў, і вельмі цяжка было амерыканцам выехаць з Турцыі і вярнуцца на радзіму. «Белавія» тысячы амерыканскіх людзей, дыпламатаў, вайскоўцаў вывезла з Турцыі ў Менск. З Менска мы ляцелі з імі ў Парыж і Амстэрдам. І адтуль пераважна авіякампаніяй Delta яны ляцелі дадому», – распавёў дырэктар Нацыянальнай авіякампаніі Беларусі.
З ягоных слоў, ужо нябожчык намеснік міністра замежных спраў Алег Краўчанка, які курыраваў у МЗС дачыненні з Амерыкай, даслоўна кожны дзень дасылаў эсэмэскі, якія прыходзілі з Дзярждэпа, з амбасады са словамі: «Дзякуй, «Белавія».
«Вельмі выразную фразу я запомніў: «Мы такую дапамогу ніколі не забудзем». Яны не забыліся», – заявіў Чаргінец.
Са слоў Ігара Чаргінца, першыя еўрапейскія санкцыі былі накладзены на Беларусь «за тое, што Лукашэнка і Пуцін пагадзіліся на аднаўленне паветраных зносін паміж сваімі краінамі пасля ковіда».
«Потым гэта зрабілі ўсе дзяржавы. А на «Белавія» за гэта накладзены санкцыі. Логікі ўвогуле ніякай», – абурыўся Ігар Чаргінец.
(Насамрэч першыя санкцыі Еўразвязу супраць авіякампаніі былі ўведзены пасля прымусовай пасадкі ў Менску самалёта Ryanair 23 траўня 2021 года – рэд.).
Чаргінец таксама даў дзіўнае тлумачэнне ўвядзенню наступнага пакета санкцый. З ягоных слоў, прадстаўнік Кітая ў ААН заявіў, што санкцыі, накладзеныя на «Белавія», незаконныя. «Сіньхуа» апублікавала гэтую заяву, і генеральны дырэктар «Белавія» на сваёй старонцы ў Facebook гэта апублікаваў.
«Вось за гэтую перапублікацыю на «Белавія» і былі накладзеныя наступныя санкцыі», – заявіў ён.
(Насамрэч у снежні 2021 года «Белавія» трапіла ў пяты пакет санкцый ЕЗ праз міграцыйны крызіс на межах Беларусі з Еўразвязам – рэд.).