Што зменіцца ў Беларусі з 1 ліпеня
4- 28.06.2024, 16:37
- 21,138
![Што зменіцца ў Беларусі з 1 ліпеня](https://i.c97.org/ai/440965/aux-head-1634550444-20211018_belarus_map_360.jpg)
Нас чакае некалькі важных навін.
Бальнічныя, пенсіі і дапамогі пачнуць выплачваць па-новаму, а блогерам трэба патрапіць у рэестр рэкламараспаўсюджвальнікаў. Bar24 сабраў найважнейшыя навінкі другога месяца лета.
Пенсіі і дапамогі зараз праз банк
Каб з 1 ліпеня не застацца без пенсій і дапамог, многім пенсіянерам і сем'ям з дзецьмі ў чэрвені трэба было адкрыць базавы рахунак. Гэта звязанае з тым, што большасць з ліпеня будзе атрымліваць гэтыя выплаты ў банку (ці з дапамогай банкаўскай карткі), а не на пошце.
Новаўвядзенне датычыцца толькі тых, хто жыве ў Менску, абласных гарадах і раённых цэнтрах. У жыхароў сельскай мясцовасці, пенсіянераў, старэйшых за 70 гадоў і інвалідаў I і II групы ўсё па-ранейшаму. Выбіраць паміж поштай і банкам па-ранейшаму могуць сем'і, у якіх ёсць дзеці з інваліднасцю І і ІІ групы, дзеці з інваліднасцю да 18 гадоў.
Па-новаму пачнуць аплачваць бальнічны
З 1 ліпеня набудуць моц змены па аплаце бальнічных. Гэта закране ўсіх работнікаў і працоўных пенсіянераў.
Сярод найбольш важных новаўвядзенняў трэба адзначыць, што для тых, хто працуе 10 гадоў і больш, бальнічныя павялічацца. Ім з першага дня будуць плаціць 100% страчанага заработку. Калі стаж меншы за 10 гадоў - 80%.
Мінімальны бальнічны прывяжуць да мінімальнага заробку. Ён зараз складае 626 рублёў. Да гэтага прывязка была да 50% бюджэту пражытачнага мінімуму агулам на душу насельніцтва.
Калі ў вас некалькі прац, то бальнічны будуць выплачваць на асноўным месцы працы.
Падатковая працягне прымаць дэкларацыі на паперы
Планавалася, што з 1 ліпеня беларускія прадпрымальнікі будуць падаваць дэкларацыі выключна ў электронным выглядзе. Аднак і пасля 1 ліпеня інспекцыі МПЗ не будуць адмаўляць ІП у прыёме падатковых дэкларацый на паперы. Такую пастанову прынялі праз максімальную загружанасць рэгістрацыйных цэнтраў і праз шматлікія звароты ад індывідуальных прадпрымальнікаў.
Адпачнём сярод тыдня
У ліпені беларусаў чакае дадатковы выходны. 3 ліпеня выпаў на сераду, таму ніякіх пераносаў не будзе.
Знізяцца кошты лячэння зубоў
Новыя тарыфы на платную стаматалогію, якія пачнуць дзейнічаць з 1 ліпеня, агучыла Міністэрства аховы здароўя.
Прадугледжваецца, што тарыфы зменяцца на некаторыя паслугі ад тэрапіі да хірургіі. Так, тарыф на пламбаванне аднаго каранёвага канала пастай павінен знізіцца на 18% (з 11,58 да 9,42 руб), а тарыф на адну працэдуру лячэння карыесу - амаль на 9% (з 41,2 да 37,67 руб).
Гэта не першая спроба ўрэгуляваць кошты ў стаматалогіі за апошні час.
Блогерам трэба патрапіць у рэестр рэкламараспаўсюджвальнікаў
З 12 ліпеня набудзе моц новая рэдакцыя закона «Аб рэкламе». Новы Закон уводзіць забарону на наданне паслуг па размяшчэнні рэкламы ў інтэрнэце тымі, хто не ўключаны ў Рэестр. Нават калі яны не з'яўляюцца СМІ і не зарэгістраваныя як сеткавыя выданні. Так што блогераў гэта датычыцца ў тым ліку.
Стартуе прыёмная кампанія ў ВНУ
Асноўны этап уступнай кампаніі-2024 у вышэйшыя навучальныя ўстановы стартуе з 12 ліпеня. Залічэнне на месцы, устаноўленыя кантрольнымі лічбамі прыёму за кошт сродкаў рэспубліканскага бюджэту, пройдзе да 27 ліпеня. На платнае навучанне - да 3 жніўня.
Залічэнне абітурыентаў-мэтавікоў, а таксама пераможцаў універсітэцкіх алімпіяд скончыцца 2 ліпеня.
Падаражэюць цыгарэты
З 1 ліпеня ў Беларусі ў чарговы раз паднімуцца кошты цыгарэт. Пра гэта паведамілі ў Міністэрстве падаткаў і збораў.
Напрыклад, на 30 капеек падаражэюць цыгарэты Kent Crystal Blue, Rothmans Blue. А таксама дзве маркі Pall Mall (Demi Blue і Demi Azure). Ад «Тытунь-інвест» на 15 капеек падаражэе «Карона Slims Green», на 20 – шэсць марак Pall Mall, Kent і цыгарэты Rothmans Blue. На 30 капеек – дзве маркі Pall Mall (Demi Blue і Demi Azure) і чатыры маркі Lucky Strike і Kent Crystal Blue.
Сярод прадукцыі ААТ “Гродзенская тытунёвая фабрыка “Нёман” на 20 капеек падаражэе па шэсць марак цыгарэт Pall Mall і Kent, а таксама чатыры гатункі Rothmans.
З'явяцца спісы тыпаў дзейнасці ІП
Праекты пералікаў дазволеных тыпаў дзейнасці для ІП самазанятых і рамеснікаў унеслі на зацвярджэнне ва ўрад. Чакаецца, што пастанову прымуць да 1 ліпеня.
У дзейнасці прадпрымальнікаў, чые тыпы ўвойдуць у пералікі, нічога не зменіцца. Калі ІП займаецца бізнэсам, якога няма ў пераліку, то яму трэба будзе перайсці ў статус юрасобы да 31 снежня 2025 года. Таксама з 1 кастрычніка нельга будзе адкрыць ІП для занятку бізнэсам не са спісу.