Кіраўнік ДДБ Літвы абвінаваціў Лукашэнку ў выкраданні літоўскіх грамадзян
6- 11.07.2024, 12:02
- 9,812
![Кіраўнік ДДБ Літвы абвінаваціў Лукашэнку ў выкраданні літоўскіх грамадзян](https://i.c97.org/ai/288993/aux-head-1525620139-20180506_litva_s.png)
З боку Вільні будуць пэўныя захады і адказы.
Дырэктар Дэпартамента дзяржбяспекі Літвы Дарус Яўнішкіс абвінаваціў беларускія ўлады ў выкраданні літоўскіх грамадзян. Так ён пракаментаваў прысуд у Беларусі Алене Раманаўскайнэ «за агентурную дзейнасць», піша DELFI.
«Сітуацыя нам вядомая, і яна выклікае занепакоенасць. Я яе ўспрымаю так, што беларускі рэжым перайшоў да выкрадання літоўскіх грамадзян без усялякай нагоды», — заявіў Яўнішкіс.
Улічваючы такія дзеянні Менска, кіраўнік ДДБ Літвы заклікаў грамадзян сваёй краіны адмовіцца ад паездак у Беларусь, каб пазбегнуць такіх сітуацый.
«Хачу перасцерагчы нашых грамадзян, у якіх яшчэ ёсць жаданне ездзіць у Беларусь па больш танныя тавары або бензін - гэты выпадак сур'ёзна сведчыць аб тым, што беларускі рэжым мае намер выкрадаць літоўскіх грамадзян», - сказаў ён.
Яўнішкіс зазначыў, што «з боку ўладаў Літвы таксама будуць пэўныя захады і адказы».
«Яны выкрадаюць грамадзян, фабрыкуюць довады, на іх падставе асуджаюць і саджаюць у турму. Гэта вельмі трывожныя тэндэнцыі. Звяртаю ўвагу грамадскасці - сур'ёзна падумайце, перш чым ехаць у той бок, бо вы можаце апынуцца на месцы той грамадзянкі», - адзначыў Яўнішкіс.
Нагадаем, што супрацоўніцу санаторыя «Беларусь», які знаходзіцца ў літоўскім Друскінінкаі, Алену Раманаўскенэ прысудзілі да шасці гадоў пазбаўлення волі «за агентурную дзейнасць».