Латвія, Літва і Эстонія адключаюцца ад Беларусі
8- 11.07.2024, 14:04
- 12,502
![Латвія, Літва і Эстонія адключаюцца ад Беларусі](https://i.c97.org/ai/394453/aux-head-1600964814-20200924_baltia_360.gif)
Краіны Балтыі выходзяць з адзінай энэргетычнай сістэмы з нашай краінай.
Латвія, Літва і Эстонія найбліжэйшыя тыдні паведамяць Беларусі і Расеі аб выхадзе з адзінай энэргетычнай сістэмы БРЭЛЛ.
Пра гэта гаворыцца ў заяве кіраўнікоў энэргетычных ведамстваў трох краін, якая апублікаваная на сайце Мінэнэрга Літвы, піша "Настоящее время".
Энэргакольца БРЭЛЛ звязвае разам энэргасістэмы краін Балтыі, Расеі і Беларусі, дазваляючы згладжваць скокі напружання ў сетцы і дыспетчарызаваць плыні энэргіі за кошт выкарыстання розных магутнасцяў.
Латвія, Літва і Эстонія прынялі пастанову выйсці з гэтай сістэмы і падпісалі пагадненне аб сінхранізацыі сетак з ЕЗ праз Польшчу. Выхад з БРЭЛЛ быў запланаваны на 2025 год.
У заяве гаворыцца, што краіны Балтыі поўнасцю гатовы да сінхранізацыі з кантынентальнай еўрапейскай электрасеткай у лютым наступнага года, таму неўзабаве беларускія і расейскія ўлады будуць праінфармаваныя аб пастанове не прадаўжаць дамову. Postimees піша, што гэта павінна быць зроблена за паўгода да запланаванага выхаду з БРЭЛ.
Пасля поўнамаштабнага ўварвання Расеі ва Украіну ўлады краін Балтыі вывучалі магчымасць паскорыць пераход. Літва заклікала адключыцца ад БРЭЛЛ ужо ў 2024 годзе. Аднак у выніку ўсе ўдзельнікі працэсу пастанавілі, што да заканчэнне падрыхтоўчых работ і выбудоўвання інфраструктуры, заўчасны сыход з БРЭЛЛ можа прывесці да нестабільнай працы энэргасістэм кожнай з краін Балтыі.