FT: Еўразвяз хоча пакараць Орбана
13- 11.07.2024, 14:56
- 15,782
![FT: Еўразвяз хоча пакараць Орбана](https://i.c97.org/ai/576264/aux-head-1703075633-20231220_orban_360.jpg)
Будзе супольны адказ.
Пасля візіту прэм'ер-міністра Вугоршчыны Віктара Орбана ў Расею лідары Еўрапейскага Звязу рыхтуюць супольны адказ на ягоную дыпламатыю, якая супярэчыць дамовам блока.
Як піша выданне Financial Times са спасылкай на суразмоўцаў, размовы лідараў наконт такіх паводзін Орбана і магчымыя меры ў адказ на іх былі на палях саміту NATO 10 ліпеня. Неафіцыйныя групы лідараў ЕЗ разглядалі напісанне супольнага ліста да вугорскага прэм'ера з выразным абурэннем і патрабаваннямі спыніць свае "несанкцыянаваныя замежнапалітычныя шпацыры".
"Досыць... Існуе шмат раздражнення і дыскусій аб тым, як даць адказ", - сказаў адзін з суразмоўцаў.
Іншая крыніца заявіла, што ёсць і іншая прапанова - склікаць спецыяльную сустрэчу міністраў у справах ЕЗ, якая будзе прысвечаная выключна разгляду парушэнняў Вугоршчыны. І хаця канчатковай пастановы сярод замежных лідараў яшчэ няма, падчас сустрэчы большасць рэзка асудзіла дзеянні Віктара Орбана.
Прадстаўнікі краін-чальцоў ЕЗ мяркуюць, што сваімі паводзінамі прэм'ер Вугоршчыны "паставіў пад пагрозу" агульныя мэты Еўрапейскага Звязу і парушыў правілы замежнапалітычнай салідарнасці.
Прэм'ер-міністр Бэльгіі Аляксандэр дэ Кроа нагадаў, што калі ён перадаў старшынства Вугоршчыне, Орбан паабяцаў зрабіць усё, каб забяспечыць бесперапыннасць і не падарваць вынікі бэльгійскага ўрада. Напраўду, на думку Кроа, ён гэтым не займаецца і ягоныя паводзіны не адпавядаюць дамоўленасцям.
Прэзідэнт Еўрарады Шарль Мішэль таксама пракаментаваў дзеянні прадстаўніка вугоршчыны ўрада. Ён падкрэсліў, што "адзінства з'яўляецца перадумовай быць моцным", а калі блок "падзелены", ён з'яўляецца слабым.
"Калі нас спрабуюць падзяліць, то гэта не ўпершыню... Мы павінны забяспечыць, каб іншыя 26 прытрымліваліся пазіцыі і не былі падзеленыя ўсялякімі спробамі пасеяць сумненні або нейкія кур'ёзныя ідэі", - дадаў Мішэль.