Прэзідэнт Кеніі распусціў кабінет міністраў пасля пратэстаў
3- 11.07.2024, 18:04
- 1,142
![Прэзідэнт Кеніі распусціў кабінет міністраў пасля пратэстаў](https://i.c97.org/ai/600527/aux-head-1719417496-20240101_ruto_360.jpg)
Пратэсты ў краіне ўспыхнулі праз планы ўладаў павысіць падаткі.
Прэзідэнт Кеніі Уільям Руто абвясціў аб роспуску кабінета міністраў пасля антыўрадавых пратэстаў, паведамляе Nation.
"Сёння ў адпаведнасці са сваімі паўнамоцтвамі я прыняў пастанову аб звальненні ўсіх сакратароў кабінета міністраў і генеральнага пракурора, за выключэннем прэм'ер-сакратара кабінета і сакратара кабінета ў замежных справах", – заявіў Руто.
У чэрвені ў Кеніі пачаліся пратэсты пасля прапановы офіса прэзідэнта ўнесці папраўкі ў закон аб бюджэце і падвысіць некаторыя падаткі. Размова ішла аб увядзенні 16 адсоткаў ПДВ на хлеб, цукар, мабільныя і фінансавыя паслугі. Законапраект прадугледжваў акцыз на алей і падатак 2,5 адсотка на аўтатранспарт. Пасля Руто не стаў падпісваць закон. Ён унёс папраўкі, парламент разгледзіць іх пасля вакацый, 23 ліпеня.
25 чэрвеня пратэстоўцы прарвалі ачапленне і ўварваліся ў будынак парламента ў Найробі. Частка будынка была падпаленая. Reuters паведамляў, што паліцыя адкрыла агонь па дэманстрантах, пасля таго як яна не змагла разагнаць натоўп з дапамогай слёзацечнага газу і вадамётаў.
У Кеніі ўвялі рэжым надзвычайнай сітуацыі і разгарнулі ўзброеныя сілы. У выніку пратэстаў загінулі больш за дзесяць чалавек, сотні пацярпелі.