Паліну Шарэнду-Панасюк скіравалі на псіхіятрычную экспертызу ў Навінкі
8- 11.07.2024, 20:08
- 5,936
Лукашысты прадаўжаюць здзекавацца з маці дваіх дзяцей.
Палітзняволеную Паліну Шарэнду-Панасюк перавялі з СІЗА Гомеля на экспертызу ў Цэнтр судовых псіхолага-псіхіятрычных экспертызаў у Навінках. Пра гэта яе муж Андрэй Шарэнда паведаміў у Facebook.
«Паліну нарэшце прывезлі ў Менск. Чарговы пякельны этап доўжыўся 9 дзён», – напісаў Андрэй Шарэнда.
Паводле ягоных словаў, у Цэнтры судовых псіхолага-псіхіятрычных экспертызаў у Навінках Паліна прабудзе некалькі тыдняў.
Тры папярэднія экспертызы (дзве праходзілі ў Навінках, а адна проста ў СІЗА) паказалі, што псіхічнае здароўе палітзняволенай знаходзіцца ў норме.
Берасцейская актывістка, маці дваіх дзяцей Паліна Шарэнда-Панасюк была затрыманая ў студзені 2021 года і ў чэрвені асуджаная да двух гадоў пазбаўлення волі паводле арт. 364, 368 і 369 КК. Адбываць пакаранне яе выправілі ў жаночую калонію № 4 у Гомелі.
Жанчына выйшла б на волю яшчэ ў 2022 годзе, але ў калоніі яе сталі ўвесь час выпраўляць у штрафны ізалятар, абвінавачваючы нібыта ў парушэнні рэжыму, а ўжо ў лютым 2022-га распачалі першую крымінальную справу паводле арт. 411 КК (Злоснае непадпарадкаванне патрабаванням адміністрацыі папраўчай установы). У красавіку суд Чыгуначнага раёна Гомеля вынес ёй прысуд – прызнаў вінаватай і прызначыў яшчэ год пазбаўлення волі.
Адбыўшы свой павялічаны тэрмін, Паліна 6 жніўня 2023 года мусіла выйсці з калоніі. Аднак яшчэ з восені было вядома, што супраць яе вядзецца другая справа – зноў паводле арт. 411 КК. У кастрычніку 2023-га жанчыну асудзілі яшчэ да года калоніі.
19 сакавіка 2024 года Камітэт ААН у ліквідацыі дыскрымінацыі ў адносінах да жанчынаў (КЛДЖ) папрасіў Беларусь тэрмінова ўжыць часовыя захады для абароны Паліны Шарэнды-Панасюк.