Ва Украіне назвалі колькасць жанчынаў, якія ваююць на перадавой
1- 11.07.2024, 20:11
- 7,538
![Ва Украіне назвалі колькасць жанчынаў, якія ваююць на перадавой](https://i.c97.org/ai/598277/aux-head-1717941471-20240609_zhenki_vsu_360.jpg)
Лік назвала віцэ-прэм'ерка Украіны Вольга Стэфанішына.
Больш за 10 тысячаў украінскіх жанчынаў праходзяць службу ў зоне ваеннай аперацыі на перадавой, заявіла віцэ-прэм'ерка Украіны ў пытаннях еўрапейскай і еўраатлантычнай інтэграцыі Вольга Стэфанішына на панэльнай дыскусіі ў рамках Грамадскага форуму NATO.
«Усё больш жанчынаў служаць у сілах абароны, і цяпер больш як 10 тыс. жанчынаў выконваюць баявыя задачы на лініі фронту», – сказала Стэфанішына.
У чэрвені намесніца міністра абароны Украіны Наталля Калмыкова расказала, што ва УСУ служаць больш за 67 тыс. жанчынаў. Паводле ейных словаў, 19 тыс. з іх – цывільныя супрацоўніцы.