ЗША папярэдзілі Індыю пасля візіту Модзі ў Маскву

Крэмль будзе дзейнічаць у інтарэсах Кітая.

Супольнікі Украіны спрабуюць пераканаць "прыязныя" Расеі краіны ў тым, што ім не варта яе падтрымліваць. Кітай можа страціць эканамічна праз пагаршэнне стасункаў з Еўразвязам, сваім найбуйнейшым гандлёвым партнёрам. Індыі ж не варта спадзявацца на развіццё доўгатэрміновых дачыненняў з Масквой, бо тая зараз моцна залежыць ад Пекіна і будзе дзейнічаць у яго інтарэсах - і супраць інтарэсаў Дэлі, папярэдзілі ЗША.

Прэм'ер-міністр Індыі Нарэндра Модзі на гэтым тыдні прыехаў у Маскву - акурат тады, калі ў Вашынгтоне сабраўся саміт NATO. Гэта зрабіла непрыемнае ўражанне ў Белым доме, асабліва выява, якая суправаджала візіт - шчырыя абдымкі паміж Модзі і Уладзімірам Пуціным, паведаміла The Washington Post са спасылкай на прадстаўнікоў адміністрацыі Джо Байдэна. Адказваючы на пытанне аб перамовах паміж лідарамі Індыі і Расеі, дарадца ў нацыянальнай бяспецы Белага дома Джэйк Саліван заявіў:

"Мы дакладна далі зразумець кожнай краіне ў свеце, уключаючы Індыю, што стаўка на Расею як доўгатэрміновага, надзейнага партнёра - нядобрая стаўка".

Расея становіцца ўсё бліжэйшай

да Кітая, растлумачыў Саліван, які, як паведамляе NDTV, месяц таму сустракаўся ў Дэлі са сваім індыйскім калегам і Модзі: “Фактычна, яна становіцца малодшым партнёрам Кітая. І ў гэтым сэнсе будзе прымаць бок Кітая і аддаваць перавагу яго Індыі кожны дзень тыдня”.

У Вашынгтоне разумеюць, што Дэлі ўстурбаваныя збліжэннем Расеі, даўняга партнёра Індыі яшчэ з савецкіх часоў, з Кітаем, дадаў Саліван: "Вядома, прэм'ер-міністр Модзі вельмі заклапочаны магчымасцю кітайскай агрэсіі супраць Індыі". У апошнія гады паміж краінамі склаліся асабліва напружаныя стасункі пасля вайсковага канфлікту на мяжы ў 2020 г.

Паездка Модзі часткова тлумачыцца жаданнем пацвердзіць статус-кво ў двухбаковых стасунках і абмежаваць уплыў Кітая, казалі экспэрты напярэдадні візіту. «Паглыбленне стратэгічнага ўзаемадзеяння паміж Расеяй і Кітаем выклікае ў Нью-Дэлі дыскамфорт, бо гэта ўсё адно што найлепшы сябар спіць з ворагам. Улічваючы нашыя асцярогі, для прэм'ер-міністра мела сэнс паехаць туды і пагаварыць з Пуціным на самым высокім узроўні», – тлумачыў Bloomberg Свасці Рао, навуковы супрацоўнік Інстытута абаронных даследаванняў і аналізу Манахара Парыкара пры індыйскім Міністэрстве абароны. Прэм'ер таксама дамовіўся з Пуціным аб тым, каб з расейскага войска, што ваюе ва Украіне, адпусцілі індыйцаў, якіх туды прывабілі падманам.

Зразумела, што даўнія сувязі паміж Расеяй і Індыяй не зменяцца раптоўна, прызнаў Саліван, але трэба, паводле ягоных слоў, глядзець на доўгатэрміновую перспектыву. ЗША, у сваю чаргу, "укладаюцца ў дэмакратычных партнёраў і саюзнікаў ва ўсім свеце, уключаючы такія краіны, як Індыя, і мы мяркуем, што гэта дасць плён па меры руху наперад", сказаў ён.

Модзі прыехаў у Маскву, нягледзячы на тое, што некалькі высокапастаўленых прадстаўнікоў Белага дома ў пачатку ліпеня выказалі калегам з Дэлі занепакоенасць тым, як такі візіт будзе выглядаць падчас саміту NATO. Сярод гэтых прадстаўнікоў быў намеснік Дзяржсакратара Курт Кэмпбэл, распавялі WP некалькі амерыканскіх чыноўнікаў; ён прасіў па магчымасці змяніць даты паездкі. У Вашынгтоне з аўторка адзначаюць 75-годдзе стварэння альянсу, чальцы якога заявілі аб доўгатэрміновай падтрымцы Украіны ў яе супрацьстаянні расейскай агрэсіі.

Але Модзі схапіў Пуціна ў мядзведжыя абдымкі і назваў "дарагім сябрам" усяго праз некалькі гадзін пасля таго, як расейская ракета ўдарыла па дзіцячай лякарні ў Кіеве. "Вельмі недарэчна", – пракаментаваў WP амерыканскі чыноўнік.

Супадзенне візіту Модзі з самітам NATO падкрэслівае ўсю складанасць сітуацыі, у якой ЗША даводзіцца пераконваць краіны Глабальнага Поўдня калі і не асуджаць Расею за дзеянні ва Украіне, то прынамсі не надаваць ёй відавочнай падтрымкі. “Мне даводзіцца весці шматлікія абарончыя баі, спрабуючы дапамагчы развіццю стасункаў [паміж ЗША і Індыяй], - заявіў у чацвер пасол ЗША ў Дэлі Эрык Гарсеці. - Я паважаю тое, што Індыі падабаецца стратэгічная аўтаномія. Але падчас канфлікту такой рэчы не існуе”.

Індыя не павінна ўспрымаць сяброўства ЗША як нешта "сама сабой зразумелае", папярэдзіў Гарсеці.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com