У NATO прызначылі спецпрадстаўніка Альянсу ва Украіне
1- 17.07.2024, 17:02
- 1,176
![У NATO прызначылі спецпрадстаўніка Альянсу ва Украіне](https://i.c97.org/ai/583783/aux-head-1708016681-20240101_nato_ukr_360.jpg)
«У яго ёсць значны досвед дасягнення вынікаў».
У сераду, 17 ліпеня, генеральны сакратар NATO Енс Столтэнбэрг абвясціў аб прызначэнні Патрыка Тэрнера спецпрадстаўніком Альянсу ва Украіне. Ён зойме гэтую пасаду ў Кіеве ў верасні гэтага года, гаворыцца ў паведамленні на сайце Альянсу.
Раней Тэрнер быў на пасадзе памочніка генеральнага сакратара NATO па аперацыях і памочніка ў пытаннях абароннай палітыкі і планавання. Ён таксама займаў шэраг найвышэйшых дзяржаўных пасад у Брытаніі, піша zn.ua.
«Патрык Тэрнер прыўнясе гады лідарства і досведу ў гэтую ролю. Як у адданага дзяржаўнага службоўца ў яго ёсць значны досвед дасягнення вынікаў. Я ўпэўнены, што ён выдатна адыграе гэтую важную ролю, бо NATO працягвае нарошчваць сваю падтрымку Украіне», - заявіў Столтэнбэрг.
Тэрнер сказаў, што для яго сапраўдны гонар быць прадстаўніком NATO ва Украіне. Ён адзначыў, што з нецярпеннем чакае, каб узначаліць прадстаўніцтва Альянсу ў Кіеве і супрацоўнічаць з украінскімі ўладамі, каб дапамагчы надаць украінцам падтрымку.
Тэрнер будзе выступаць у якасці каардынатара ўзаемадзеяння NATO з украінскімі ўладамі. Ён будзе даваць Альянсу ацэнкі і парады аб сітуацыі ва Украіне.
Аб прызначэнні спецпрадстаўніка і стварэнні праграмы падтрымкі Украіны хаўруснікі дамовіліся на саміце NATO ў Вашынгтоне. Тады ж краіны-сябры назвалі шлях Кіева ў Альянс «незваротным».
Раней намеснік кіраўніка офіса прэзідэнта Украіны Ігар Жоўква заявіў, што вынікі саміту NATO ў Вашынгтоне з'яўляюцца станоўчымі для Украіны. З яго слоў, сустрэча лідараў сёлета стала больш рэзультатыўнай, чым леташняя ў Вільні.