Зяленскі: Усе аэрадромы РФ, якія выкарыстоўваюцца для атак на Украіну, маюць быць знішчаныя
6- 18.07.2024, 20:08
- 3,378
![Зяленскі: Усе аэрадромы РФ, якія выкарыстоўваюцца для атак на Украіну, маюць быць знішчаныя](https://i.c97.org/ai/603385/aux-head-1721322511-20240101_zelenski_360.jpg)
Прэзідэнт Украіны зноў заклікаў Захад дазволіць удары ўглыб тэрыторыі РФ.
Прэзідэнт Украіны Уладзімір Зяленскі зноў заклікаў Захад дазволіць удары ўглыб тэрыторыі РФ. Гэта трэба, каб усе аэрадромы, з якіх РФ атакуе Украіну, былі знішчаныя.
Аб гэтым ён заявіў падчас удзелу ў інаўгурацыйнай пленарнай сэсіі саміту Еўрапейскай палітычнай супольнасці, піша РБК-Украіна са спасылкай на трансляцыю.
«Я звяртаюся да ўсіх вас, да ўсіх лідэраў, якія могуць зрабіць свой унёсак у неабходную адвагу. Гэтыя крокі (дазволіць удары па РФ — рэдакцыя) неабходна зрабіць. І я звяртаюся перш за ўсё да Злучаных Штатаў, Вялікай Брытаніі, Францыі, Нямеччыны і Польшчы ды іншых сяброў — ваша адвага можа мець вызначальнае значэнне для свету», — запэўніў ён.
Паводле ягоных слоў, вайсковыя аэрадромы, з якіх расейскія самалёты ўзлятаюць з бомбамі на ўкраінскія месты і дзяцей, месцы старту расейскіх ракет — усё гэта мае быць знішчана.
«Гэта не толькі знішчыць некаторыя цэлі, але і зменшыць магчымасці Расеі працягваць гэтую вайну. Ракеты і беспілотнікі не з'яўляюцца «носьбітамі дзяржаўнага суверэнітэту», таму мае быць калектыўная воля, калектыўная воля іх збіць — гэтак жа, як гэта было з іранскімі ракетамі і беспілотнікамі», — сказаў далей ён.
Таксама Зяленскі падаў прыклад эфектыўнасці ўдараў па РФ на прыкладзе Харкаўскай вобласці, бо, на ягоную думку, "рэальнасць на полі бою больш тлумачыць, чым якія-небудзь размовы".
«Мы не далі Расеі прасоўвацца на Харкаўшчыне. Кропка. Пуцін ахвяраваў дзясяткі тысяч сваіх грамадзян. Але нічога не дасягнуў. Нічога важнага і значнага. Гэта стала магчымым дзякуючы адвазе нашых ваяк і адвазе нашых партнёраў, якія знялі абмежаванні ў выкарыстанні зброі побач з мяжой. Ці прычынілася гэта да эскалацыі? Не. Наадварот, заблакавала спробы Пуціна ў пашырэнні вайны. Ці адрэагаваў Пуцін? Не», — сказаў ён.
Нават калі расейскія ракеты ўдарылі па «Ахматдзеце» па дзецях з анкалагічнымі захворваннямі, то, са слоў прэзідэнта, гэта толькі прадэманстравала тое зло, якое дэманструе РФ з пачатку вайны, а такім чынам, на ягоную думку, трэба дзейнічаць максімальна адважна, каб дасягнуць вынікаў.
«Мы можам закончыць гэтую вайну дзякуючы намаганням дыпламатычным і намаганням збройным. І мы не маем марнаваць магчымасці. Чым больш дзейснай будзе СПА, тым больш беспарадным будзе Пуцін. Чым менш у нас будзе абмежаванняў у эфектыўным выкарыстанні зброі, тым больш РФ будзе спрабаваць рухацца ў кірунку супакою», — запэўніў Зяленскі.