Беларуса прызналі непрыдатным да войска, а пазней перадумалі і ўсё роўна выклікалі

Ён абурыўся несправядлівасцю.

У пачатку траўня суд Лёзненскага раёна Віцебскай вобласці разгледзеў крымінальную справу супраць мясцовага жыхара аб ухіленні ад набору ў войска. Малады чалавек не змог змірыцца з тым, што яго прызналі годным да службы, і знік у Расеі. Аднак гэта не выратавала яго ад суда. «Люстэрка» расказала дэталі апублікаванага прысуду.

Жыхар адной з вёсак Лёзненскага раёна Андрэй (імя выдуманае) уважаўся за непрыдатнага да вайсковай службы праз стан здароўя і быў залічаны ў запас. Аднак улетку 2023 года яго выклікалі на пераагляд. Пасля медыцынскага абследавання хлопца нечакана прызналі прыдатным да службы і паставілі на ўлік. Неўзабаве ён атрымаў позву з'явіцца на восеньскі набор.

Такі паварот падзей зусім не задаволіў Андрэя. Ён быў упэўнены, што ў яго ёсць захворванне, якое перашкаджае праходжанню службы. Малады чалавек паспрабаваў абскардзіць пастанову раённай прызыўной камісіі ў вышэйшай інстанцыі, але і Віцебская абласная камісія пацвердзіла ягоную прыдатнасць.

Згодна з позвай, хлопец мусіў з'явіцца ў прызначаны дзень а 8-й на абласны зборны пункт у Віцебску для адпраўкі да месца службы. Аднак ні там, ні ў ваенкамаце ён не з'явіўся да самага канца восеньскага набору.

Паводле закону, у такім выпадку чалавек цягам пяці дзён пасля заканчэння абставінаў, якія перашкаджалі з'явіцца на позву, павінен прыбыць у ваенкамат і падаць дакументы для пацверджання ўважлівай прычыны няяўкі.

Аднак і гэтага Андрэй таксама не зрабіў. Хлопец проста з'ехаў у Расею на заробкі.

Калі адшукаць маладога чалавека не атрымалася, ваенкамат перадаў матэрыялы міліцыі, і супраць яго распачалі крымінальную справу паводле ч. 1 арт. 435 КК (Ухіленне ад набору на тэрміновую службу). Як менавіта яго затрымалі, у справе не гаворыцца: верагодна, гэта здарылася, калі Андрэй прыехаў з Расеі дадому.

Суд над хлопцам адбыўся ў пачатку траўня сёлета.

«Меркаваў несправядлівым стаўленне да мяне з боку ваенкамата, не быў згодны з высновай медыцынскай камісіі», – растлумачыў Андрэй свае ўцёкі ад набору. Пры гэтым ён пацвердзіў, што не меў уважлівых прычынаў для нез'яўлення і разумеў, што парушае закон. Хлопец поўнасцю прызнаў сваю віну і раскаяўся.

У выніку суд паставіўся да Андрэя даволі паблажліва. Беручы да ўвагі, што малады чалавек раней не быў асуджаны, мае сталае месца жыхарства і характарызуецца здавальняльна, яму прызначылі пакаранне ў выглядзе аднаго года пазбаўлення волі ўмоўна з выпрабавальным тэрмінам на год. Гэта значыць, што калі цягам года ён не парушыць закон, то не трапіць у калонію.

Акрамя таго, Андрэю трэба выканаць 100 гадзінаў грамадска карысных працаў і выплаціць у дзяржаўны бюджэт крымінальна-прававую кампенсацыю памерам 2000 рублёў.

Растлумачым, паводле закону пры наяўнасці судзімасці мабілізаваць на службу ў войска не могуць. Аднак як толькі асуджанасць будзе знятая, малады чалавек зноў трапіць у распараджэнне ваенкамата. Паводле часткі 1 артыкула 435 КК судзімасць пагашаецца праз год пасля адбыцця пакарання. Калі хлопцу на той момант будзе ўсё яшчэ менш за 27 гадоў, то яго выклічуць у войска.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com