КНДР адмовілася ад кітайскага спадарожніка на карысць расейскага
4- 2.07.2024, 11:18
- 3,042
![КНДР адмовілася ад кітайскага спадарожніка на карысць расейскага](https://i.c97.org/ai/601231/aux-head-1719908288-20240702_ekspress103_360.jpg)
Пасля візіту Пуціна.
КНДР зараз выкарыстоўвае замест кітайскага спадарожніка для трансляцыі нацыянальнай тэлевізіі расейскі спадарожнік. Пра гэта паведамляе Reuters.
Сігналы Карэйскай цэнтральнай тэлевізіі Паўночнай Карэі пачынаючы з 29 чэрвеня перадаюцца праз расейскі спадарожнік Экспрэс 103 замест кітайскага спадарожніка ChinaSat 12.
Як зазначае Reuters, замена спадарожніка адбылася пасля візіту расейскага дыктатара Уладзіміра Пуціна ў КНДР 18 чэрвеня. Са звестак журналістаў, урадавыя ўстановы і СМІ Паўднёвай Карэі адсочваюць дзяржаўныя СМІ Паўночнай Карэі як абмежаваную крыніцу інфармацыі – нягледзячы на палітызаваны і прапагандысцкі кантэнт.
У Reuters адзначаюць, што глядзець паўночнакарэйскую тэлевізію ў анлайн-рэжыме магчыма, але сігнал можа затрымлівацца ці якасць малюнка быць нізкай. Пакуль невядома – ці часова Паўночная Карэя пераключыла сваё вяшчанне на расейскі спадарожнік, ці гэтая змена стане сталай.