Калапс на поўдні Расеі: Батайск паўстаў і патрабуе святла
12- 20.07.2024, 11:25
- 15,508
Жыхары места выходзяць на стыхійныя мітынгі.
На поўдні Расеі і ў акупаваным Крыме чацвёрты дзень запар вымыкаюць электрычнасць пасля маштабнай хібы на Растоўскай АЭС. Людзі пачалі выходзіць на стыхійныя мітынгі. Пра гэта паведамляе Діалог.UA.
У Растоўскай вобласці ўведзеныя графікі вымыканняў на распараджэнне "Сістэмнага аператара Адзінай энэргетычнай сістэмы". У якасці прычыны пазначаны "надмерны цяжар на транзітных лініях Валгаград – Растоў". Без святла засталіся цэлыя раёны.
Каласальныя праблемы з электрычнасцю ў акупаваным Крыме. Веерныя вымыканні пачаліся яшчэ ў аўторак, 16 ліпеня, і закранулі Сімферопаль, Ялту, Алушту, Еўпаторыю, Феадосію, Керч, Судак, Сакі ды іншыя населеныя пункты паўвострава. 19 ліпеня быў цалкам пазбаўлены электрычнасці горад Алушта, амаль 50 тысяч жыхароў засталіся без электразабеспячэння ў наймацнейшую спякоту. Крымскі гаўляйтар Сяргей Аксёнаў сцвярджае, што праблема ўзнікла праз палом дзвюх трансфарматарных падстанцый.
Праблемы з электразабеспячэннем паўднёвых рэгіёнаў РФ, а таксама акупаванага Крыма пачаліся 16 ліпеня пасля аварыі на Растоўскай атамнай станцыі. Адзін з энэргаблокаў быў экстранна спынены аўтаматыкай праз палом турбагенератара. Улады РФ сцвярджаюць, што палом зліквідаваны, аднак наладзіць стабільную падачу святла не выпала.
Жыхары горада Батайска, што ў Растоўскай вобласці, пачалі выходзіць на стыхійныя мітынгі. Яны скардзяцца на маштабныя вымыканні святла і патрабуюць неадкладна выправіць сітуацыю.