ЗША рассакрэцілі звесткі аб сваім ядравым арсенале
- 20.07.2024, 17:25
- 2,560
![ЗША рассакрэцілі звесткі аб сваім ядравым арсенале](https://i.c97.org/p/articles/2016/ai-194687-aux-head-20160311_usa_rakety_t.jpg)
У апошні раз звесткі публікаваліся ў 2021-ым.
У верасні 2023 года ядравы арсенал Злучаных Штатаў складаў 3748 боегаловак. Такія звесткі на сваім афіцыйным сайце апублікавала Нацыянальнае агенцтва ядравай бяспекі (NNSA) краіны ў суботу, 20 ліпеня. У апошні раз ведамства абнародавала падобную інфармацыю ў кастрычніку 2021 года, адзначае «Нямецкая хваля».
У дакуменце пад назвай «Празрыстасць запасаў ядравай зброі ЗША» (Transparency in the US Nuclear Weapons Stockpile) гаворыцца, што Злучаныя Штаты працягваюць памяншаць колькасць ядравай зброі. Так, у перыяд з 1994 да 2023 года ЗША дэмантавалі 12088 ядравых боегаловак. Яшчэ амаль 2000 цяпер «зняты з узбраення і чакаюць дэмантажу».
Агулам, сцвярджае ведамства, амерыканскія ядравыя запасы зменшыліся на 88% з 1967 года. Акрамя таго, з 30 верасня 1991 г. больш чым на 90% скарацілася колькасць нестратэгічнай ядравай зброі.