Беларус толькі ў 99 гадоў наважыў атрымаць пасведчанне аб нараджэнні
11- 23.07.2024, 18:38
- 9,286
Да 100-годдзя мужчына надумаў нарэшце разабрацца з дакументамі і аформіць іх як належыць.
У жыхара вёскі Індычаў (Камянецкі раён) у пашпарце не пазначана дакладная дата нараджэння - толькі год. Да 100-годдзя мужчына наважыўся нарэшце разабрацца з дакументамі і аформіць іх як належыць.
Гісторыю Міхаіла Фёдаравіча Лася расказвае kamenec.by. Як пішуць журналісты, у пашпарце ў мужчыны замест даты нараджэння пазначаныя «загадкавыя іксы». Каб атрымаць нармальны дакумент, трэба спачатку аднавіць пасведчанне аб нараджэнні. А гэта працэс доўгі.
- Падобныя звароты з просьбай аднавіць дату нараджэння даволі рэдкія, - тлумачыць Вольга Жыгальская, начальніца аддзела ЗАГС. - Мы можам аднавіць запіс акта аб нараджэнні толькі на падставе пастановы суда, у якой павінны быць устаноўленая судом дата нараджэння гэтага чалавека, прозвішча, імя, імя па бацьку яго бацькі і маці, месца нараджэння. Так, у пасляваенныя гады, калі масава аднаўляліся даты нараджэння дзяцей, ды і дарослых, гэтая працэдура была прасцейшай — дастаткова было толькі заявы грамадзяніна.
Адзіны дакумент, дзе названая дата нараджэння пенсіянера, - гэта вайсковы білет. Там напісана, што ён нарадзіўся 15 лютага 1925 года - магчыма, з яго ж слоў. Гэтага выявілася недастаткова.
У Камянцы сталі думаць, як дапамагчы пенсіянеру аднавіць дакладную дату нараджэння. Напісалі ў Гарадзенскі нацыянальна-гістарычны архіў, у епархіяльны архіў у Берасці, зрабілі запыты ў раённы вайсковы камісарыят і райаддзел па грамадзянстве і міграцыі - нідзе не знайшлося дакументальнага пацвярджэння званай даты.
У пошуках «доваднай базы» старшыня суда наткнулася на запісы ў пасляваеннай пагаспадарчай кнізе і на некалькіх яе старонках выявіла вышэйназваную дату нараджэння. Запіс у вайсковым білеце таксама стане аргументам.
Выязное пасяджэнне суда ўжо прызначанае на 31 ліпеня — яно пройдзе дома ў Міхаіла Фёдаравіча. Як толькі ён атрымае пасведчанне аб нараджэнні, зможа зрабіць і новы пашпарт з поўнай датай нараджэння.