Рэжым Лукашэнкі працягвае «адціскаць» маёмасць палітвязняў

Сёння прадалі надзел Віктара Бабарыкі.

У сераду, 31 ліпеня, на электронным аўкцыёне пляцоўкі «Белюразабеспячэнне» прайшлі таргі, на якіх прадавалі зямельны надзел з лазняй у вёсцы Мачанах Лагойскага раёна. Маёмасць належала палітвязню Віктару Бабарыку. У выніку аб'ект набылі за 331 647 рублёў, паведамляе «Зеркало».

Аўкцыён па продажы дзялянкі пачаўся 31 ліпеня а 9.00, ён стартаваў са 152 695 рублёў. У таргах бралі ўдзел пяць чалавек. У выніку, маёмасць яго прадалі за 331.647 рублёў.

Пляц плошчай 0,75 га ў вёсцы Мачанах Лагойскага раёна (гэта амаль 20 км ад МКАД) належаў палітвязню Віктару Бабарыку. Маёмасць арыштаваная следчымі органамі, рэгістрацыйныя дзеянні з ім былі забароненыя.

Зямля знаходзіцца ў водаахоўнай зоне вадасховішча Вяча, яна прызначалася для вядзення ўласнай падсобнай гаспадаркі. На пляцы размешчаная лазня з прафіляванага бруса, сцены ў ёй аздобленыя драніцай. Памер пабудовы 9×7,2 метра, ёсць тэраса 9,7×7,8 метра.

У будынку праведзеная электрычнасць. Апарня абабітая вагонкай з лісцяных парод. Усталяваная дроўная печ для лазні Кastor Saga 20 TS1.

Нагадаем, экс-старшыня праўлення «Белгазпрамбанка» Віктар Бабарыка 12 траўня 2020 года заявіў аб сваіх прэзідэнцкіх амбіцыях. Да моманту рэгістрацыі кандыдатаў Бабарыка быў ужо затрыманы. У рэгістрацыі яму адмовілі на падставе інфармацыі з ліста КДК.

6 ліпеня 2021 года Вярхоўны суд вынес прыгавор. Віктар Бабарыка атрымаў 14 гадоў калоніі ўзмоцненага рэжыму. Суд прызнаў яго вінаватым у атрыманні хабару ў асабліва значнай суме, арганізаваным групай, а таксама ва ўчыненні фінансавых аперацый са сродкамі, атрыманымі загадзя злачынным шляхам. Віктар Бабарыка на судзе сваю віну не прызнаў.

Увечары 26 красавіка 2023 года з'явілася інфармацыя аб тым, што Віктар Бабарыка, зняволены ВК-1 Наваполацка, у ноч на 25 красавіка быў шпіталізаваны ў гарадскую лякарню са слядамі збіванняў і пнеўматораксам. Раніцай 27 красавіка блізкім палітыка ўдалося пацвердзіць факт яго шпіталізацыі ў хірургічнае аддзяленне. Дзяржорганы каментаваць сітуацыю адмовіліся.

27 красавіка 2023 года штаб Віктара Бабарыкі паведаміў, што экс-банкір заставаўся ў шпіталі, яго не збіраліся куды-небудзь перавозіць, бо транспартаванне было жыццёва небяспечнае. Аднак у наступныя дні пра дакладнае месцазнаходжанне Бабарыкі ў яго камандзе не ведалі, убачыць яго не ўдалося.

2 траўня таго ж года сваякі Віктара Бабарыкі спрабавалі патрапіць на прыём да кіраўніцтва Дэпартамента выканання пакаранняў (ДВП) МУС. Але ім адмовілі ў прыёме.

З таго часу інфармацыі пра Бабарыку вельмі мала, невялікія звесткі паведамляюць экс-палітвязні, якія выйшлі на волю з калоніі.

Раней праз аўкцыёны прадалі іншую маёмасць Віктара Бабарыкі, у тым ліку аўтамабіль і гадзіннік.

Зямельны надзел экс-банкіра - самы дарагі актыў, адабраны ў палітвязняў і выстаўлены на продаж. Калі браць апанентаў Лукашэнкі агулам, то даражэй прадалі толькі кватэру Валерыя Цапкалы — амаль за 400 тысяч рублёў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com