Мбапэ дэбютуе за «Рэал» у матчы за Суперкубак УЕФА
3- 14.08.2024, 20:37
- 2,578
![Мбапэ дэбютуе за «Рэал» у матчы за Суперкубак УЕФА](https://i.c97.org/ai/606786/aux-head-1723656160-20240101_mbpa_360.jpg)
Гульня пройдзе сёння ў Варшаве.
Мадрыдскі «Рэал» абвясціў стартавы склад на будучы матч за Суперкубак УЕФА супраць італьянскай «Аталанты». З першых хвілінаў на пасля выйдзе форвард каманды Францыі Кіліян Мбапэ, для якога гэта будзе дэбютны матч за гішпанскі клуб.
Цалкам стартавы склад «Рэала» выглядае наступным чынам: Цібо Куртуа, Даніэль Карвахаль, Эдэр Мілітаа, Антоніа Рудыгер, Ферлан Мендзі, Федэрыка Вальвердэ, Арэльен Тчуамені, Джуд Белінгем, Радрыга, Кіліян Мбапе, Вінісіус Жуніёр.
Гульня ў Варшаве пачнецца а 22-й паводле Менска.
Французскі нападнік перайшоў у мадрыдскую каманду на правах свабоднага агента пасля заканчэння кантракта з «Пары Сэн-Жэрмэн». Пагадненне з «Рэалам» ён падпісаў 16 ліпеня. Прэзентацыю форварда на «Санцьяга Бернабеу» наведалі больш за 80 тыс. чалавек.
За ПСЖ ён выступаў з 2017 года, з парыжскай камандай форвард стаў шасціразовым чэмпіёнам Францыі.
25-гадовы Мбапэ ў мінулым сезоне забіў 44 галы ў 48 матчах. У камандзе Францыі ён з 2017 года правёў 84 гульні і забіў 48 мячоў, заваяваў золата ЧС-2018, срэбра ЧС-2022, бронзу Еўра-2024.
«Рэал» у мінулым сезоне перамог у Лізе чэмпіёнаў, чэмпіянаце і Суперкубку Гішпаніі.