У Менску будуць судзіць былога намесніка кіраўніка турэмнай сістэмы Беларусі і камбрыга ўнутраных войск

І не аднаго, а разам з жонкай.

У Менску за ўдзел у пратэстах будуць судзіць Сяргея Сандалюка - былога намесніка начальніка Дэпартамента выканання пакаранняў (ДВП) МУС, высветліла «Зеркало». Гэтае ведамства кіруе ўсёй пенітэнцыярнай сістэмай Беларусі - турмамі, калоніямі, СІЗА і іншымі папраўчымі ўстановамі. Разам з мужчынам судзяць і ягоную жонку.

Імёны Сяргея Сандалюка і Анжэлы Сандалюк з'явіліся ў раскладзе суда Кастрычніцкага раёна Менска. Працэс над імі пачнецца 6 жніўня а 10.30 і будзе адкрытым.

Мужа іжонку судзяць паводле адной крымінальнай справы. Ім выстаўленае абвінавачанне ў «актыўным удзеле ў групавых дзеяннях, якія груба парушаюць грамадскі парадак». Гэта ч.1 арт.342 КК — так званы народны артыкул, паводле якога рэпрэсуюць большасць шараговых удзельнікаў мірных пратэстных маршаў 2020 года.

Даведаўшыся аб будучым судзе, «Зеркало» праверыла асобу абвінавачаных з дапамогай BELPOL і пераканалася, што гаворка ідзе менавіта пра былога намесніка начальніка ДВП.

Шмат гадоў ва ўнутраных войсках

Палкоўнік унутранай службы Сяргей Сандалюк нарадзіўся ў Мазыры ў 1971 годзе, зараз яму 53 гады. Ён шмат гадоў служыў у вайсковай часці 7404 у Баранавічах - гэта 4-я спецыяльная міліцэйская брыгада ўнутраных войск МУС. У 1996 годзе Сандалюк, з яго слоў, камандаваў там ротай, а ў 2000-х даслужыўся да камандзіра часці. Прынамсі, у канцы 2012 года ён, мяркуючы з публікацый у СМІ, яшчэ займаў гэтую пасаду.

Нейкі час Сандалюк таксама служыў у буйной 5-й брыгадзе Унутраных войск МУС у Магілёве (в/ч 6713). Яна сёння ўключае міліцэйскую в/ч 5527 у Бабруйску, стралковыя батальёны ў Магілёве, Бабруйску, Горках і Шклове, патрульны батальён у абласным цэнтры. Палкоўнік быў там начальнікам штаба - першым намеснікам камандзіра часці.

Турэмны начальнік

Ужо ў 2013 годзе Сяргей Сандалюк пайшоў на павышэнне і стаў намеснікам начальніка Дэпартамента выканання пакаранняў. На гэтай пасадзе ён адказваў за ідэалагічную працу і кадравае забеспячэнне. Палкоўнік некалькі разоў адзначыўся ў СМІ: ён праводзіў экскурсіі па калоніях для журналістаў дзяржвыданняў, супрацоўнічаў з Экзархатам Беларускай праваслаўнай царквы, абмяркоўваў узаемадзеянне ДВП і царквы з мітрапалітам Паўлам.

«Для некаторых зняволеных турэмны лад жыцця сапраўды становіцца рамантыкай. За доўгія гады адседкі яны адвыкаюць ад волі і ў звычайным жыцці губляюцца. Калі за калючым дротам ён герой, аўтарытэт, з ім лічацца, то на волі ён „ніхто“ і клікаць яго „ніяк“. Такому прасцей учыніць новае злачынства і зноў апынуцца на нарах», - казаў міліцыянт дзяржвыданню «СБ» у 2013 годзе.

За Сандалюком ДВП арганізоўваў спартыўныя спаборніцтвы з запрашэннем замежных гасцей. Напрыклад, як мінімум у 2017 і 2018 гадах у Гародні праходзіў Адкрыты чэмпіянат Дэпартамента выканання пакаранняў МУС у валейболе. У ім удзельнічалі каманды супрацоўнікаў ДВП з усіх рэгіёнаў Беларусі, а таксама зборная акруговай турэмнай службы Беластоцкага ваяводства Польшчы. Дарэчы, абодва гады пераможцамі турніру станавіліся менавіта прадстаўнікі заходняй суседкі. Пасля чаго чэмпіянат, здаецца, праводзіць перасталі: інфармацыі аб матчах пачынаючы з 2019 года няма.

Выхад на пенсію?

На мяжы 2018-2019 гадоў Сяргей Сандалюк пайшоў у адстаўку з пасады намесніка кіраўніка ДВП. Пра гэта ў пачатку студзеня 2019-га пісаў блог NEXTA, намякаючы на нейкі скандал у ведамстве, а крыніцы выдання «Наша Ніва» казалі, што Сандалюк няўдала паспрабаваў прыкрыць ад адказнасці свайго кіроўцу, які «трапіў у непрыемную сітуацыю, звязаную з ужываннем сілы».

Сам жа палкоўнік у каментары выданню сказаў, што не трэба верыць чуткам, ён проста выйшаў на міліцэйскую пенсію і мае намер знайсці сабе новую працу.

У тым жа студзені 2019 года Сандалюк зарэгістраваўся ў Ленінскім раёне Менска ў якасці індывідуальнага прадпрымальніка, каб надаваць паслугі па здачы жылля на дзень. Яго ІП застаецца дзейным дагэтуль.

З жонкай Анжэлай мужчына знаходзіцца ў шлюбе з 1999 года (прынамсі, знаходзіўся - у «Зеркала» няма магчымасці высветліць, ці не аформіла пара развод у апошні час). Інфармацыі пра жанчыну ў інтэрнэце амаль няма - толькі тое, што ў пачатку 2000-х яна некалькі гадоў была аформленая прадпрымальніцай у Менску, але затым закрыла ІП.

Што пагражае былому функцыянеру МУС

Калі Сяргей і Анжэла былі затрыманыя, невядома. Таксама няма інфармацыі аб тым, ці змяшчалі іх на час следства ў СІЗА ці яны знаходзяцца на волі.

Былому намесніку кіраўніка беларускіх турмаў і ягонай жонцы паводле «народнага» артыкулу пагражае пакаранне ў выглядзе арышту на тэрмін да 3 месяцаў, альбо абмежавання волі на тэрмін ад 2 да 5 гадоў, альбо пазбаўлення волі на тэрмін да 4 гадоў.

Суддзёй паводле справы выступае Алена Жывіца.

З 2020 года яна вынесла некалькі соцень рэпрэсіўных прысудаў і адміністрацыйных пастаноў паводле палітычна матываваных спраў. Зрэшты, менавіта Жывіца судзіла за пратэсты музыкаў гурта Nizkiz.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com