NYT: Стаўленне расейцаў да Пуціна змянілася
13- 23.08.2024, 7:56
- 15,378
![NYT: Стаўленне расейцаў да Пуціна змянілася](https://i.c97.org/ai/507545/aux-head-1658316065-20220720_putin_Getty_360.jpg)
Стала вядомая прычына.
З таго часу, як УСУ два тыдні таму пачалі аперацыю ў Курскай вобласці, стаўленне расейцаў да Пуціна пагоршылася. Пра гэта сведчыць аналіз сацсетак і іншых допісаў у інтэрнэце.
Пра гэта паведамляе The New York Times.
Спасылаючыся на аналіз кампаніі FilterLabs AI, выданне піша, што ў шматлікіх публікацыях у інтэрнэце сцвярджаюць, што аперацыя УСУ з'яўляецца няўдачай урада РФ, і ў тым ліку расейскага дыктатара Уладзіміра Пуціна.
Паколькі ацаніць рэальнае грамадскае меркаванне ў РФ складана, FilterLabs адсочвае каментары на сайтах сацсетак, інтэрнэт-допісы і навінавыя сайты, выкарыстоўваючы кампутарную мадэль для аналізу настрояў, выяўленых простымі расейцамі.
Так, паводле аналізу, станоўчае стаўленне да Пуціна пахіснуліся яшчэ летась, калі пад кіраўніцтвам кіраўніка ПВК «Вагнера» Яўгена Прыгожына быў учынены ваенны мяцеж. Але змена настрояў стала больш рэзкай у тыя дні, калі УСУ пачалі аперацыю ў Курскай вобласці на захадзе Расеі.
«Рэакцыя Пуціна на ўварванне была расцэненая найлепшым выпадку як неадэкватная, а ў найгоршым - як абразлівая», - заявіў генеральны дырэктар FilterLabs Джонатан Тайбнэр.
Як паведамляецца, стаўленне да расейскага дыктатара застаецца больш пазітыўным у Маскве, дзе Расея больш жорстка кантралюе СМІ і грамадскія дыскусіі. Але і там меркаванне пра Пуціна пагоршылася, хаця і не так хутка, як у іншых рэгіёнах краіны. Згодна з аналізам, у глыбінцы Расеі расце расчараванне ў Крамлі.
Амерыканскія чыноўнікі папярэдзілі, што яшчэ занадта рана меркаваць аб тым, ці будзе шкода, нанесеная рэпутацыі Пуціна, доўгатэрміновай. З іх слоў, аўтарытэт Пуціна ў Расеі хутка аднавіўся пасля таго, як Прыгожын спыніў свой бунт, а расейскі дыктатар у сваю чаргу, пастаянна дэманструе здольнасць маніпуляваць грамадскай думкай пра сябе.
Тым не менш, пастаянная страта папулярнасці можа ўскладніць магчымасці Крамля весці вайну ва Украіне. Настроі ў дачыненні да Пуціна рэзка ўпалі менавіта ў тых рэгіёнах РФ, дзе Крэмль засяроджвае свае намаганні для набору ў войска. Адзначаецца, што стратэгія Крамля ў галіне вярбоўкі залежыць ад здольнасці кіраваць успрыманнем вайны.
«Калі прэстыж і папулярнасць Пуціна ўпадуць у гэтых ключавых рэгіёнах (асабліва калі расейцы адчуюць, што вайна ідзе дрэнна), Крамлю будзе складаней папоўніць свае вайсковыя шэрагі», – гаворыцца ў аналізе FilterLabs.
Крэмль працягвае ўплываць на тое, як нацыянальныя СМІ РФ асвятляюць вайну, і толькі нямногія з іх публікуюць прыкметныя матэрыялы. Аднак рэгіянальныя навінавыя выданні менш схільныя перабольшваць навіны.