У Telegram шакаваныя затрыманнем Дурава, але ўжо маюць план дзеянняў
16- 25.08.2024, 13:17
- 9,706
![У Telegram шакаваныя затрыманнем Дурава, але ўжо маюць план дзеянняў](https://i.c97.org/p/articles/ai-254012-aux-head-20170623_telegram_t.jpg)
У Расеі распаўсюджваецца паніка.
Кампанія Telegram загадзя распрацавала план дзеянняў на выпадак затрымання свайго заснавальніка Паўла Дурава. Згодна з гэтай стратэгіяй рада распрацоўнікаў Telegram павінна ўжыць усе неабходныя захады для забеспячэння бесперапыннай працы сэрвісу.
Пра гэта паведамляе расейскі Telegram-канал Mash.
Асяроддзе Дурава назвала дзеянні французскіх улад «шакавальнымі» і незаконнымі, уважаючы затрыманне Дурава за «асабістую вендэту» прэзідэнта Францыі Эмануэля Макрона.
У кампаніі даўно зацверджаны план дзеянняў на выпадак арышту ўладальніка мэсэнджара, хаця падрабязнасці гэтага плана пакуль невядомыя. Нягледзячы на магчымы арышт Дурава, Telegram працягне працаваць і выконваць свае задачы, паведамілі суразмоўцы кампаніі. Распрацоўнікі павінны зацвердзіць план, пасля чаго ён будзе рэалізаваны.
Паводле версіі французскіх судовых органаў, Павел Дураў датычны да незаконнай дзейнасці, якая ажыццяўляецца праз яго мэсанджар, прынамсі, незаконнае абарачэнне наркотыкаў, педафільскага кантэнту і махлярства. Акрамя таго, ён не супрацоўнічаў з паліцыяй па расследаванні гэтых спраў. Дурава павінны прадставіць перад французскім судом у нядзелю, 25 жніўня.
У той жа час, паводле інфармацыі французскіх СМІ, сапраўднай прычынай яго затрымання з'яўляецца жаданне ўрада Францыі атрымаць доступ да зашыфраваных паведамленняў у мэсэнджары, якія немагчыма расшыфраваць без ключоў. Гэтую версію ўскосна пацвярджаюць следчыя, а таксама галоўнае абвінавачанне, якое тычыцца нібыта распаўсюджвання кантэнту з дзіцячай парнаграфіяй.
У Расеі ў гэты час распаўсюджваецца паніка. Расейцаў непакоіць магчымасць, што ў выпадку, калі Парыж зможа «націснуць» на Дурава, краіны ЕЗ атрымаюць доступ да перапіскі ў мэсэнджары, якую зараз актыўна выкарыстоўваюць расейскія вайскоўцы як асноўны сродак сувязі на фронце вайны ва Украіне.
Намеснік старшыні Дзярждумы РФ Уладзіслаў Даванкоў накіраваў ліст міністру замежных спраў Расеі Сяргею Лаўрову з патрабаваннем дамагацца вызвалення Дурава. Ён мяркуе, што затрыманне ўладальніка мэсэнджара мае палітычны падтэкст і можа пагражаць інтарэсам Расеі.