Металургічная імперыя расейскага мільярдэра Патаніна апынулася на краі фінансавай прорвы
11- 26.08.2024, 18:40
- 10,114
![Металургічная імперыя расейскага мільярдэра Патаніна апынулася на краі фінансавай прорвы](https://i.c97.org/ai/413667/aux-head-1614886433-20210304_potanin_360.gif)
«Нарнікель» сутыкнуўся з немагчымасцю прадаваць метал за мяжу.
Расейскі горнаметалургічны холдынг «Нарнікель» – найбуйнейшы ў РФ вытворца плаціны, паладыю і нікелю – сутыкнуўся з немагчымасцю прадаваць метал за мяжу і атрымліваць за яго грошы ад кліентаў. Пра гэта паведамляе «Інтэрфакс» са спасылкай на крыніцы, знаёмыя са зместам канферэнц-званка, які кампаній правяла для інвестараў.
У справаздачнасці за першае паўгоддзе «Нарнікель», які належыць мільярдэру Уладзіміру Патаніну, паведаміў аб значным павелічэнні абаротнага капіталу – на 20%, да $3,7 млрд. Гэты рост – на $600 млн за 6 месяцаў – адлюстроўвае назапашванне нераспрададзенай прадукцыі і недаатрыманыя кампаніяй выплаты, паведамілі крыніцы «Інтэрфакса».
Са слоў аднаго з іх, кіраўніцтва «Нарнікеля» на званку апісвала сітуацыю як «ідэальны шторм»: да праблем з правядзеннем выплат дадаўся рост адсоткавых ставак па крэдытах, а таксама падзенне коштаў металаў. Да прыкладу, нікель за апошні год патаннеў на 18%, а паладый - на 23%.
За паўгоддзе чысты прыбытак «Нарнікеля» ўпаў на 22%, да $829 млн; EBITDA — на 30% да $2,35 млрд, а па грашовых плынях кампанія і зусім стала стратнай: паступленні на рахункі выявіліся меншымі за адток на $159 млн. Каб кампенсаваць гэты касавы разрыў, «Нарнікель» быў вымушаны значна павялічыць пазыку (на $1,4 млрд за паўгода), а таксама пачаць марнаваць запасы грошай на рахунках, вынікае з яго справаздачнасці. Так, грашовыя сродкі і іх эквіваленты ў кампаніі за паўгоддзе скараціліся з $2,139 млрд да $1,903 млрд.
Са слоў крыніц «Інтэрфакса», топ-мэнэджары «Нарнікеля» запэўнілі інвестараў, што ў другой палове года запасы не распраданай прадукцыі са складоў будуць рэалізаваныя, а грашовая плынь стане станоўчай. У той жа час яны прызналі, што шмат у чым развіццё сітуацыі залежыць ад Кітая: Азія стала найбуйнейшым рынкам збыту «Нарнікеля», а яе доля ў продажах дасягнула 52%.
Ці зможа «Нарнікель» развязаць свае праблемы, застаецца незразумелым: на мінулым тыдні ЗША ўвялі новыя санкцыі супраць яго ключавых даччыных прадпрыемстваў, а гэта значыць, што сітуацыя з лагістыкай і грашовымі транзакцыямі можа пагоршыцца, папярэджвае аналітык «Велес Капитала» Васіль Данілаў.
У «чорныя спісы» амерыканскага Мінфіна з забаронай на ўсе аперацыі і блакіроўкай усіх актываў былі ўнесеныя галоўны, Запалярны філіял «Нарнікеля», а таксама Быстрынскі ГАК, прадукцыю якога планавалі адгружаць у Кітай. У красавіку санкцыі супраць нікелю расейскага паходжання ўвялі ЗША і Брытанія.
«Нарнікель» сутыкнуўся з «неспрыяльнымі вонкавымі ўмовамі», якія «націснулі на бізнэс», заявіў у пятніцу ў каментары справаздачнасці Патанін.
«Падзенне цэн нікелю і паладыю, складанасці з лагістыкай у Чырвоным моры, а таксама рост цяжкасцяў з трансгранічнымі выплатамі вельмі негатыўна адбіліся на нашым даходзе, рэнтабельнасці і свабоднай грашовай плыні», - паскардзіўся бізнэсовец.