Індыя пакінула Расею без нержавеючай сталі
7- 26.08.2024, 19:31
- 8,550
![Індыя пакінула Расею без нержавеючай сталі](https://i.c97.org/ai/355068/aux-head-1573381339-20191110_flag_indii_360.jpg)
Пастаўкі абрынуліся ўтрая.
Расейскія прадпрыемствы сутыкнуліся са значным скарачэннем адгрузак нержавеючай сталі ад аднаго з ключавых пастаўшчыкоў - Індыі.
За першае паўгоддзе ў РФ было імпартавана 20 тысяч тон індыйскай нержавейкі - утрая менш, чым за той жа перыяд годам раней, паведамляюць «Ведомости» са спасылкай на звесткі Bigmint.
Летась на Індыю прыпала 20% імпартных паставак нержавейкі ў Расею, якія агулам склалі 486 тысяч тон. Уласнай вытворчасці нержавейкі ў супастаўных аб'ёмах у Расеі няма, а залежнасць ад імпарту дасягае 70-80%, адзначаюць «Ведомости».
Гэты матэрыял выкарыстоўваецца ў машынабудаванні, вытворчасці бытавой тэхнікі, электраабсталявання, труб для нафтагазавай галіны і нафтахіміі, а таксама для патрэб вайскова-прамысловага комплексу.
Галоўнай прычынай абвальнага падзення паставак нержавеючай сталі з Індыі сталі праблемы ў Чырвоным моры, дзе паўстанцы-хусіты атакуюць судны-кантэйнеравозы. У выніку час транзіту значна вырас, а кошт фрахту ўзляцеў агулам на 100%, а для асобных маршрутаў на 300%, паказваюць аналітыкі Bigmint.
Акрамя Індыі, нержавейку ў Расею пастаўляюць Кітай (больш за палову аб'ёмаў), Інданезія (6,5%) і Турцыя (2%). Урад Расеі паставіў задачу значна знізіць залежнасць ад імпарту нержавеючай сталі. Згодна са стратэгіяй развіцця металургічнай прамысловасці, да 2030 года краіна павінна забяспечваць уласнымі заводамі да 85% патрэбнасцей у нержавеючай сталі. Найбуйнейшы завод магутнасцю 500 тысяч тон на год у Валгаградскай вобласці плануе пабудаваць «Нарнікель». Яго запуск намечаны на 2026 год.