Палыхаюць цыстэрны: дроны атакавалі нафтабазу ў Растоўскай вобласці РФ
10- 28.08.2024, 7:45
- 16,276
Бушуе маштабны пажар.
Уночы з 27 да 28 жніўня была атакаваная нафтабаза паблізу пасёлка Маладзёжны ў Каменскім раёне Растоўскай вобласці РФ. Пра гэта паведаміў мясцовы расейскі тэлеграм-канал «Это Ростов новости».
"Мяркуецца, гарыць нафтабаза ў Каменскім раёне пасля гучнага выбуху, які чулі ў Растоўскай вобласці", – гаворыцца ў паведамленні.
Паводле інфармацыі з сацсетак на тэрыторыі нафтабазы загарэліся некалькі цыстэрнаў з палівам, з-за чаго ўзнік вялікі пажар.
Як паведамілі падпісчыкі расейскага тэлеграм-канала Mash, выбухі прагрымелі а 3 гадзіне ночы.
У той жа час губернатар Растоўскай вобласці Васіль Голубеў а 3:23 заявіў, што ў рэгіёне былі збітыя чатыры беспілотнікі.
“А 03:00 ночы ў Растоўскай вобласці збіты 4 БПЛА. Паводле папярэдніх звестак, пацярпелых няма. Інфармацыя ўдакладняецца”, - напісаў Голубеў.
Пазней у мясцовых пабліках паведамілі, што гараць рэзервуары камбіната "Атлас".
"Гэта не першая атака, раней 3 жніўня туды ўжо прыляталі дроны “УСУ", – гаворыцца ў паведамленні.
Паводле звестак расейскага выдання Baza, сама нафтабаза размешчаная каля пасёлка Маладзёжны.
Мясцовыя жыхары паведамляюць, што цяпер гараць адразу дзве цыстэрны з палівам. Акрамя таго, гучна было і ў раёне мясцовага аэрадрома Марозаўск.