Беларус спрабаваў зрабіць сабе бясплатны праезд, «прызначыўшы» сабе II групу інваліднасці
2- 29.08.2024, 19:11
- 2,900
![Беларус спрабаваў зрабіць сабе бясплатны праезд, «прызначыўшы» сабе II групу інваліднасці](https://i.c97.org/ai/441944/aux-head-1635242922-20211026_bus_360.jpg)
Цяпер можа атрымаць "крыміналку".
Пасажыр паказаў кантралёру пасведчанне інваліда II групы, якое дае права на бясплатны праезд. Дакумент быў фальшывым. Да чаго гэта прывяло, распавялі ў Камітэце судовых экспэртыз.
Выпадак здарыўся ў цягніку на маршруце «Гародня — Узбярэж». Кантралёр засумняваўся ў сапраўднасці дакумента і выклікаў міліцыю. Дакумент накіравалі на судовую тэхнічную экспэртызу.
З яе вынікаў устаноўлена, што на пасведчанні змянілі першапачатковы запіс: па-над ім дадалі цяпер чытаны запіс "другая".
![](https://i.c97.org/ai/608708/aux-1724947807-1.jpg)
- Пасля высветлілася, што мужчына 1957 года нараджэння, з'яўляючыся інвалідам III групы, надумаў "зрабіць" бясплатны праезд у грамадскім транспарце, "прызначыўшы" сабе II групу інваліднасці, - гаворыцца ў паведамленні.
Паводле гэтага факту праводзіцца праверка. Судовыя экспэрты нагадваюць, што за падробку, выраб, выкарыстанне або збыт падробленых дакументаў, штампаў, пячатак, бланкаў заканадаўствам прадугледжаная крымінальная адказнасць.