У «Менск Міры» здарыўся незвычайны пажар
4- 7.08.2024, 19:19
- 2,646
![У «Менск Міры» здарыўся незвычайны пажар](https://i.c97.org/ai/605875/aux-head-1723047589-20240101_imam_360.jpg)
Пажарнікі тушылі падпалены ўнітаз на балконе.
Незвычайны пажар адбыўся ў «Менск Міры» 6 жніўня. Мясцовая жыхарка зняла на відэа, як на балконе адной з кватэр гарэў унітаз, а тушыць яго прыехалі некалькі машын МНС. Кадры яна апублікавала ў TikTok.
«Эпічная раніца, тушылі падпалены ўнітаз на балконе», - напісала яна.
Ролік набраў ужо амаль 190 тысяч праглядаў, а карыстачы пакінулі мноства каментароў. Большасць цікавіла, як унітаз апынуўся на балконе і чаму ён гарыць. Некаторыя здзівіліся такой колькасці машын, якія прыехалі яго тушыць.
«Дзеля тушэння туалета 5 машын прыехала», - напісаў адзін з каментатараў.
Іншы запярэчыў яму, адзначыўшы, што гэта нармальна: «Людзі, чаму вы думаеце, што на тушэнне шматпавярховага дома прыедзе адна машына? А калі пажар распаўсюдзіцца, у гэтых дамах тысячы людзей, гэты ўнітаз, можа, загарэўся таму, што кватэра гарыць».
Частка карыстальнікаў выказала здагадку, што гэта вучэнні, іншыя пачалі жартаваць з нагоды таго, што нехта на ноч з'еў востры перац халапеньё або вострыя крылцы KFC.
З нагоды таго, як мог загарэцца ўнітаз, некаторыя выказалі здагадку, што ўладальнік выкарыстоўваў яго замест попельніцы на балконе.