Z-прапаганда завыла пасля маштабнага ўдару дронаў УСУ па РФ
1- 1.09.2024, 12:42
- 9,154
![Z-прапаганда завыла пасля маштабнага ўдару дронаў УСУ па РФ](https://i.c97.org/ai/609020/aux-head-1725183766-20240901_npz_rus_360.jpg)
Расейскія блогеры скардзяцца на «дзіравую» СПА.
Z-прапагандысты нервова адрэагавалі на маштабны ўдар дронаў УСУ па Расеі. 158 дронаў атакавалі 15 абласцей Расеі.
Расейскія блогеры скардзяцца на «дзіравую» СПА і абвінавачваюць у хлусні міністэрства абароны Расеі, піша «Дыялог».
Вялікі допіс з нагоды налёту апублікаваў вядомы расейскі Z-ваенкар Ілля Туманаў (Fighterbomber), які звязаны з ВКС РФ.
Ён выказаў незадаволенасць тым, што Мінабароны РФ бадзёра рапартуе аб нібыта перахопе 158 БПЛА, калі ўвесь свет назірае кадры падпаленых ДРЭС і НПЗ у Расеі.
«Фактам з'яўляецца толькі адзін параметр - аб'ект знішчаны ці не… Калі ён гарыць, то, адпаведна, знішчаны. І ўжо без розніцы, разбілі яго мільёнамі дронаў або адным. Дрон гэты быў, ці свая зенітная ракета, ці ўвогуле бабка з запалкамі яго спаліла… Таму 1 дрон ці ракета, але якая трапіла ў цэль, значна страшнейшая за 1000 дронаў і ракет, якія нікуды не трапілі. Лічыць трэба гэты адзін», - напісаў ён.
Больш рэзка выказаўся Z-ваенкар Alex Parker Returns, які хаваецца ў Канадзе. Ён адкрыта абвінавачвае Мінабароны РФ у хлусні.
«Ужо можна канстатаваць факт, што іх ударныя і колькасныя магчымасці значна ўзраслі. Цэлі знішчаныя. Ёсць відэафіксацыя прылётаў па гідраэлектрастанцыях і НПЗ. Дзіравае СПА, як звычайна, не дало рады… Але Мінабароны дало справаздачу, што збіта 100 500 беспілотнікаў. Так, сапраўды збіта. Электрастанцыямі і НПЗ. Класічнае «памыляцца можна, а хлусіць трэба». І так у іх заўсёды», - паскардзіўся расейскі ультрапатрыёт.