Defence Express: Наступствы ўдараў дронаў па Маскве немагчыма схаваць
8- 1.09.2024, 13:47
- 17,876
![Defence Express: Наступствы ўдараў дронаў па Маскве немагчыма схаваць](https://i.c97.org/ai/609028/aux-head-1725187666-20240901_npz_rus2_360.jpg)
Як бы ні стараліся расейскія ўлады.
Уночы 1 верасня расейскія аб'екты энэргетыкі атакавалі далёкабойныя дроны. Падчас налёту былі пашкоджаныя «Кашырская ДРЭС», «Канакаўская ДРЭС», а таксама Маскоўскі НПЗ.
Як піша Defence Express, хаця пакуль афіцыйных пацвярджэнняў украінскай стараны няма, аднак ёсць што аналізаваць. Так, аналітыкі мяркуюць, што "кампанія ўдараў зайшла ў новы віток".
"Калі пачынаць з такога базавага ўзроўню, то цалкам можна вывесці рэдукцыю, што ад сённяшняга ўдару нашых БЛА па расейскіх ДРЭС і НПЗ у Маскве літаральна будзе гарэць, прычым – праз некалькі чыннікаў адразу", – адзначаюць эксперты.
Яны звярнулі ўвагу, што Маскоўскі НПЗ размешчаны ў межах расейскай сталіцы, а таму пашкоджанне важнага аб'екта немагчыма схаваць, хаця мэрыя і сцвярджае, што прычынай пажару стала падзенне падбітага дрона на тэхнічнае памяшканне. Аднак прапагандысты і мэдыі пішуць, што пажар атрымаў найвышэйшы клас складанасці.
Сама ж НПЗ мае магутнасць 11 млн. тон нафты на год. Важна тое, што гэтае прадпрыемства забяспечвае 40% патрэбы ў бензіне і 50% — у дызэльным паліве самой Масквы, а таксама з'яўляецца асноўным прадаўцом авіяцыйнага паліва для сталічных аэрапортаў.
«Калі ж гаварыць пра пашкоджаныя расейскія ДРЭС, то тут трэба падаць такія дэталі. Для пачатку растлумачым, што ў гэтым выпадку «ДРЭС» з расейскай мовы расшыфроўваецца як «дзяржаўная раённая электрастанцыя», гэта значыць тут гаворка не ідзе пра нейкі асаблівы тып генерацыі, гэта фактычна тыя ж цеплавыя электрастанцыі», — адзначылі ў Defence Express.
Паводле апошніх звестак, Кашырская ДРЭС з 2021 года знаходзіцца на мадэрнізацыі. Расейцы спадзяваліся пад 2028 год павялічыць яе магутнасць з 410 МВт да больш як 800 МВт генерацыі. У той жа час станцыя ў Канакова мае ажно 2520 МВт генерацыі, а таму пашкоджанне такога аб'екта можа мець больш адчувальныя наступствы для энэргасістэмы дзяржавы-агрэсара.